नांदगाव तालुक्यातील दुष्काळाने घेतला पहिला बळी..!

घाटमाथ्यावरील जातेगाव येथील ह्रदयद्रावक घटना..

नांदगाव-: संतोष कांदे
सुमारे ६० फूट खोल विहीर खोदून पाणी लागले नाही,म्हणून तिला आडवे बोर करत असताना पाय घसरून विहिरीत पडलेल्या शेतकऱ्याचा मृत्यू झाल्याची ह्रदयद्रावक घटना तालुक्यातील जातेगाव येथे घडली आहे.या घटनेने तालुक्यातील दुष्काळाचे विदारक वास्तव समोर आले आहे.
         याबाबत अधिक असे की,येथील नामदेव त्र्यंबक थोरात (वय-५५) यांच्या शेतातील विहिरीत नवीनच खोदलेल्या विहिरीला पाणी लागले नाही,म्हणून आडवे बोर करण्याचे काम सुरू होते.तेव्हा आडव्या बोरला पाणी येते की नाही,हे विहिरीच्या कठड्यावरून वाकून बघत असताना,त्यांचा पाय घसरला आणि ते विहिरीत पडले,त्यातच त्यांचा मृत्यू झाला.
         दरम्यान जमतेम पाण्यावर उत्पादित झालेल्या कांदा पिकाची मातीमोल भावाने वाट लागल्यात जमा आहे.आणि आता जनावरांना चारा व पाणी तसेच ग्रामस्थांना पिण्याचे पाणी मिळावे हा एकच हेतू ठेवून तालुक्याची वाटचाल सुरू आहे.ज्या शेतकऱ्यांकडे पाणी आहे,त्यांच्या खाजगी विहिरीतील पाणी प्रशासनाने अधिग्रहित केले असता,त्यांनी नंतर मात्र भविष्यकाळातील पाण्याची निकड बघता,गावाला पाणी देण्याचे नाकारल्याने याच जातेगावमधील पाणीप्रश्न बिकट बनला आहे.
सध्या पारंपारिक विहिरींनीही तळ गाठल्याने नवीन विहिरी किंवा बोरवेल घेण्याचे काम युद्धपातळीवर सुरू आहे.पिण्याच्या पाण्यासह,जनावरांच्या पिण्याचा पाण्याचा प्रश्न ही गंभीर स्वरूप धारण करू लागला आहे.