कै. मुंडे प्रतिष्ठानचा उपक्रम कौतुकास्पद-तहसीलदार श्रीमती सागरे

नांदगाव-: प्रतिनिधी

ग्रामीण भागातून शिक्षण घेणाऱ्या मुलींना चार लोक नाव ठेवतात,तर चार लोक कौतुक ही करतात.मात्र याकडे डोळेझाक करून आपले इस्पित साध्य करायचे असते.असा महत्वपूर्ण सल्ला तहसीलदार श्रीमती भारती सागरे यांनी दिला.

        यावेळी व्यासपीठावर अध्यक्षस्थानी मनमाडच्या नगराध्यक्षा सौ.पद्मावती धात्रक,प्रमुख पाहुणे म्हणून माजी आमदार जगन्नाथ धात्रक,सरपंच परिषदच्या तालुकाध्यक्ष सौ.मंगला नावंदर,पत्रकार सुरेश शेळके,अनिल आव्हाड आदी उपस्थित होते.

      तालुक्यातील जळगाव बुद्रुक येथील स्वर्गीय गोपीनाथ मुंडे प्रतिष्ठानच्या वतीने येथील ग्रामपंचायतीत स्थापनेनंतर प्रथमच एक महिला सरपंच सौ.गिताबाई संजय गिते,उपसरपंच श्रीमती मिराबाई अहिरे,आणि ग्रामसेवक श्रीमती राठोड ही महिलाच असा योगायोग जुळून आल्याने या महिलांचा सन्मान सोहळा ग्रामपंचायत आवारात आयोजित करण्यात आला होता,कार्यक्रमाच्या सुरुवातीस पुलवामा हल्ल्यात शहीद झालेल्या जवानांना श्रद्धांजली अर्पण करण्यात आली.त्यानंतर सरस्वती,छत्रपती शिवाजी महाराज,डॉ.बाबासाहेब आंबेडकर,सावित्रीबाई फुले,कै. गोपीनाथ मुंडे यांच्या प्रतिमेचे पूजन करून कार्यक्रमास सुरुवात करण्यात आली.

          त्याप्रसंगी तहसीलदार श्रीमती सागरे बोलत होत्या.त्या पुढे बोलताना म्हणाल्या की,मी ही मागासवर्गीय कुटुंबातून पुढे आले,ज्या कुटुंबात उच्च शिक्षण घेणे मुलींसाठी दिव्य होते,त्या परिस्थितीत मी शिक्षण घेतले,माझी हुशारी बघून पालकांनी मला साथ दिली,अन त्यामुळे मी माझे ध्येय गाठू शकले.आणि आपण समाजाचे काहीतरी देणे लागतो,ही भावना छत्रपती शिवाजी महाराज,छत्रपती शाहू महाराज,डॉ.बाबासाहेब आंबेडकर,महात्मा फुले,सावित्री बाई फुले यांच्या जीवन कार्याचा अभ्यास केल्यानंतर मला समजली.आणि त्यानुसारच माझे कार्य सुरू आहे.असेही त्या म्हणाल्या,तसेच टेलिव्हिजन चा अर्थ जेव्हापासून 'टोटल वाटोळं' असा मला कळला,तेव्हापासून थेट तहसीलदार होईपर्यंत मी टीव्ही बघितला नाही.असे त्या शेवटी म्हणाल्या.

        यावेळी पत्रकार सुरेश शेळके यांनी त्यांना उत्कृष्ट पत्रकार पुरस्कार मिळाला,म्हणून या प्रतिष्ठानने माझा सत्कार केला याबाबत कृतज्ञता व्यक्त केली,तर सरपंच परिषद च्या तालुकाध्यक्ष सौ.मंगला नावंदर यांनी महिलांचा सन्मान करणाऱ्या या कै. गोपीनाथ मुंडे प्रतिष्ठान चा गौरव केला.तर विद्यालयाचे शिक्षक जयवंत भाबड यांनी ही महिलांच्या विविध कायद्याची माहिती यावेळी दिली.यावेळी अध्यक्षीय भाषणातून नगराध्यक्षा सौ.धात्रक यांनी 'पुलवामा'हल्ल्यातील शहीद जवानांसाठी ऐ मेरे वतन के लोगो' हे गीत अत्यंत सुरील आवाजात गात अनोखी श्रद्धांजली अर्पण केली.

       कार्यक्रमाचे सूत्रसंचालन आदर्श शिक्षक पुरस्कार विजेते दिपक हिरे यांनी तर प्रास्ताविक प्रतिष्ठानचे अध्यक्ष नवनाथ कांदे यांनी केले.आभार प्रदर्शन प्रतिष्ठानचे सरचिटणीस संतोष कांदे यांनी मानले.या कार्यक्रमास माजी सरपंच रामदास घुगे,धनराज बुरकुल,कैलास बागुल,सौ.पुंजाबाई बोडके,नामदेव आव्हाड,चंद्रकांत घुगे,गणेश आव्हाड,वाळूबा गिते,संजय सांगळे,अंगणवाडी सेविका सौ.मंगल कांदे, विजया गिते,छाया सोनवणे,विमल आंधळे,आशा सेविका सौ.मथुरा घुगे,प्रभाकर निकुंभ,दत्तू बोडके,काशीनाथ सांगळे,भगवान वाघ,संतोष बुरकुल,आदींसह शेकडो ग्रामस्थ उपस्थित होते.