खा.चव्हाण यांना घरचा आहेर.!

नांदगाव-: संतोष कांदे

भाजपचे दिंडोरी मतदार संघाचे खासदार हरिश्चंद्र चव्हाण हे भाजपच्या कार्यकर्त्यांऐवजी 'भाजपचा टिळा लावून दुसऱ्याचा संसार' करणाऱ्या कार्यकर्त्यांचीच कामे करत असल्याचा आरोप एका प्रसिद्धी पत्रकाद्वारे जेष्ठ नागरीक आघाडीचे जिल्हाध्यक्ष सजनतात्या कवडे यांनी केला आहे.

     वरील आरोपाचे स्पष्टीकरण देताना कवडे यांनी पुढे नमूद केले आहे की,केंद्र शासनाच्या ज्या काही शासकीय समित्या आहेत,त्या जागेवर निष्ठावंत भाजप कार्यकर्ते डावलून अन्य राजकीय पक्षात असणाऱ्या कार्यकर्त्यांना संधी दिली जात आहे.मध्य रेल्वेच्या सल्लागार समितीवर एका अशा कार्यकर्त्याला नियुक्ती देण्यात आली,ज्याचा भाजप पक्षाशी काहीही संबंध नाही.मात्र १९८० पासून म्हणजेच पक्षाच्या स्थापनेपासून आजतागायत भाजप मध्येच आयुष्य व्यतीत केलेले कार्यकर्ते आहेत,आज भाजप सत्तेवर असला तरी कार्यकर्त्यांच्या डोक्यात हवा गेली नाही,मात्र लोकप्रतिनिधी आपल्याच पक्षाच्या कार्यकर्त्यांना वाऱ्यावर सोडून अन्य पक्षांतील लोकांची कामे करण्यात धन्यता मानत आहेत.

    पक्षाची ध्येयधोरणे,विचार,विकासमकामे मात्र भाजप कार्यकर्ते मोठ्या निष्ठेने लोकांपर्यंत पोहचवत आहेत.त्याचबरोबर नुकतीच झालेली सीएम चषक स्पर्धा असो वा बाईक रॅली यात जुने व नव्या दमाचे कार्यकर्ते हिरीरीने सहभागी झाले होते.लोकप्रतिनिधींनी आपल्या पक्षाच्या कार्यकर्त्यांच्या कामाची जाणीव ठेवावी.अशी अपेक्षा ही कवडे यांनी व्यक्त केली आहे.या निवेदनावर कवडे यांच्यासह बाजार समितीचे संचालक राजेंद्र देशमुख यांच्यासह अनेक भाजप कार्यकर्त्यांची नावे व सह्या आहेत.