स्वातंत्र्याच्या ७० वर्षानंतर अस्वलदऱ्यात भरली शाळा.!

नांदगाव-: संतोष कांदे

इंग्रज काळापासून चोरी,दरोडा टाकणारी जमात असा शिक्का बसलेल्या पारधी समाज एकविसाव्या शतकात ही शिक्षणापासून कोसो दूर आहे,हे सत्य आजच्या काळात कुणाला खरे वाटणार नाही.नांदगाव  शहरापासून अवघ्या काही अंतरावर असलेल्या अस्वलदरा वस्तीत स्वातंत्र्याच्या ७० वर्षानंतर प्रथमच 'शाळा' भरणार आहे.आणि हे शिक्षणाचे शिवधनुष्य राष्ट्रीय बालकामगार प्रकल्प नाशिक अंतर्गत शिवतीर्थ सेवाभावी बहुउद्देशीय संस्थेने उचलले आहे.

      या बाबत अधिक असे की,गेल्या अनेक वर्षांपासून जिल्ह्यात किंवा जिल्ह्याबाहेर कुठेही दरोडा पडला तर पोलिसांचा प्रथम संशय फासेपारधी या समाजावर जातो.आणि काही प्रकरणात या समाजातील व्यक्तींचा सहभाग आढळून आल्याने या संशयाला बळकटी मिळून हा समाज विकासापासून व समाजाच्या मुख्य प्रवाहापासून कोसो दूर आहे.

     तालुक्यातील फासेपारधी समाजाची ३५ घरांची  अस्वलदरा वस्ती याचे जिवंत उदाहरण म्हणावे लागेल.या वस्तीवर आज वरील संस्थेने विशेष प्रशिक्षण केंद्र सुरू केले.तर येथील शिक्षणबाह्य असलेल्या मुलांना शैक्षणिक साहित्याचे मोफत वितरण शहरातील शिवसंस्कार बहुउद्देशीय संस्थेने केले.यावेळी संस्थेने फ़ळा, डस्टर, खडू, शाळेच्या पाट्या, पेंसिल,बाराखडी,मराठी,इंग्रजी मुळाक्षरे असलेले डिजिटल फलक,उजळणी फलक,शरीर ओळख दर्शवणारे फलक,बसण्यासाठी चटया,राजगिरा लाडू अशा शैक्षणिक साहित्याचा समावेश होता.

       यावेळी या मुलांनी भारत माता की जय.... वंदे मातरम ...जय जवान....जय किसान या घोषणा देत शाळेचा पहिला दिवस साजरा केला.या ऐतिहासिक घटनेचे साक्षीदार म्हणून साकोरा गटाचे जिल्हा परिषद सदस्य रमेश बोरसे,शिवसंस्कार संस्थेचे अध्यक्ष सुमित गुप्ता,ग्रामपंचायत सदस्य संजय सुरसे, सामाजिक कार्यकर्ते वामन पोतदार,रमनलाल लोढा,या वस्तीचे मुखीया श्री.भोसले,संदीप जेजुरकर, कुदरतअली शहा, राजेंद्र तळेकर, सुभाष भोसले, गरुड़ सर, वाल्मीक उराडे, प्रविण नंन्नावरे आदींसह वस्तीवरील पारधी बांधव उपस्थित होते.