अखेर सापळा पूर्णत्वास........
नांदगाव - संतोष कांदे
तालुक्यातील मनमाड शहरात मुरूम वाहतूक करणाऱ्या एका व्यक्तीला तत्कालीन तहसीलदारांच्या वाहन चालकाने 'मॅडम' साठी लाच मागितली,म्हणून त्याच्यावर लाचलुचपत प्रतिबंधक कायद्यांनव्ये गुन्हा दाखल करून अटक करण्यात आली.
या बाबत अधिक असे की,मनमाड शहर परिसरात वास्तव्य करून असलेल्या एका व्यक्तीने घरासमोर टाकण्यासाठी मुरूम आणलेला होता.तो नेमका तहसीलदारांच्या नजरेत पडला.आणि त्या व्यक्तीला रितसर दंड ही करण्यात आला.मात्र दंड भरल्यानंतर तत्कालीन तहसीलदार श्रीमती भारती सागरे यांचे वाहन चालक ज्ञानेश्वर कदम (सध्या नियुक्ती आस्थापना विभाग जिल्हाधिकारी कार्यालय नाशिक) यांनी तक्रारदारास भेटून तुमच्यावर भविष्यात कारवाई करू नये,म्हणून 'मॅडम साठी १० हजार व मला २ हजार अशी लाच ३१ डिसेंबर २०१८ रोजी मागितली होती.त्यावेळी तक्रारदाराने नाशिक लाचलुचपत प्रतिबंधक विभागाकडे याची तक्रार केली होती,मात्र एका डब्बे पुरवणाऱ्या व्यक्तीमुळे हा ट्रॅप अयशस्वी झाला.मात्र लाचेची मागणी केल्याचे पुरावे सादर केल्याने आज तीन महिन्यानंतर गुन्हा दाखल करण्यात आला आहे.
दरम्यान या संदर्भात तत्कालीन तहसीलदार श्रीमती भारती सागरे (सध्या नगर जिल्हाधिकारी कार्यालयात सं.गां.यो.तहसीलदार) यांच्याशी संपर्क साधला असता,मी त्या वाहन चालकाला (ज्ञानेश्वर कदम) पदभार स्वीकारल्यानंतर एक महिन्यातच कार्यमुक्त केले होते.आणि त्याची रवानगी जिल्हाधिकारी कार्यालयात आस्थापना विभागाकडे केली होती,माझा या प्रकरणाशी कुठलाही संबंध नाही.असे सांगितले.
यावेळी या लाचलुचपत प्रतिबंधक पथकात पोलीस निरीक्षक प्रभाकर निकम,पोलीस नाईक वैभव देशमुख,पोलीस नाईक नितीन कराड आदींचा समावेश होता.याप्रसंगी पो.नि.निकम यांनी तालुक्यातील जनतेला जाहीर आवाहन करून,शासकीय अधिकारी, कर्मचारी,किंवा त्यांच्या वतीने खाजगी व्यक्ती ही लाच स्वीकारत असेल तर बिनदिक्कतपणे तक्रार करा,असे आवाहन केले आहे.
दरम्यान आज सकाळपासूनच सदर पथकाने येथे तळ ठोकून गौण खनिज संदर्भात संबंधित सर्व कागदपत्रे हाताळणाऱ्या कर्मचाऱ्यांची कसून चौकशी केली.
Comments
Post a Comment