मानलेल्या नात्याची जपणूक करताना मृत्यूचे आलिंगन.!

नांदगाव-: संतोष कांदे

मानलेल्या नात्यातील एकाच्या दशक्रिया विधीसाठी जात असलेल्या एका शेतकऱ्याचा कुत्रे आडवे आल्याने अपे रिक्षा उलटून जागीच मृत्यू तर ; तीन जण गंभीर जखमी झाल्याची घटना आज सकाळी साडे आठ वाजेच्या सुमारास नांदगाव-साकोरा बायपास रस्त्यावर घडली. 

      नांदगाव पोलिसांनी दिलेली माहिती अशी की,वेहेळगाव-नांदगाव अशी खाजगी प्रवासी वाहतूक करणारी अपे रिक्षा (क्र-एम.एच.४१ व्ही.२०६५) प्रवासी भरून तळवाडे कडे चालली होती.तीत जळगाव बुद्रुक येथील पाच-सहा प्रवासी तळवाडे येथे दशक्रिया विधीसाठी चालले होते.उड्डाणपुलाजवळ असलेल्या बायपासच्या उतारावर अचानक एक कुत्रे आडवे आले,त्याला शिताफीने टाळले,मात्र लगेचच काही क्षणात दुसरे कुत्रे पुढच्या चाकात अडकले आणि वेगात असलेली अपे रिक्षा पलटी होऊन सात ते आठ फूट फरफटत गेली.

      यावेळी चालकाजवळ पण कडेला बसलेले शिवाजी एकनाथ दिघोळे यांच्या डोक्याला जबरदस्त आघात होऊन त्यांचा जागीच मृत्यू झाला.तर सतू दराडे (रा.सत्यगाव ता.येवला), मिराबाई घुगे,यमुनाबाई दिघोळे जखमी झालेत.गंभीर जखमी झालेल्या दराडे यांना नाशिक येथे तर किरकोळ जखमींवर नांदगाव ग्रामीण रुग्णालयात उपचार करण्यात आले.तर या अपघातात मृत्यू पावलेल्या शिवाजी दिघोळे यांच्यावर जळगाव बुद्रुक येथे अत्यंत शोकाकुल वातावरणात अंत्यसंस्कार करण्यात आले.

    दरम्यान आज तळवाडे येथे ज्या दशक्रिया विधी जात असताना शिवाजी दिघोळेंना मृत्यूला कवटाळावे लागले,त्यांचा व यांचा वास्तविक काहीच संबंध नव्हता.मात्र ते जळगाव बुद्रुक येथील ज्ञानेश्वर गिते यांचे मामा होते.आणि गिते आणि दिघोळे यांच्यात मानलेल्या नात्याचा भावनिक ओलावा होता.आणि या नात्यातूनच दिघोळे या दशक्रिया विधीसाठी चालले होते.पुढील तपास पोलीस निरीक्षक अनिल भवारी यांच्या मार्गदर्शनाखाली हवालदार सुरेश सांगळे,श्री.कुमावत,श्री.मुंढे करत आहेत.