न केलेल्या कामाचे डिजिटल फलकबाजीतून कौतुक.!

    : संतोष कांदे

 नार-पारचे पाणी तालुक्याला मिळावे,यास्तव पदरमोड करून जिल्हा,राज्य आणि देशपातळीवरील शासकीय कार्यालयांचे,मंत्र्यांचे उंबरठे आम्ही झिजवले,तेव्हा कुठे या संभाव्य योजनेत तालुक्याचा समावेश होण्याबाबतची कार्यवाही सुरू झाली आहे.आणि असे असताना विद्यमान लोकप्रतिनिधी आगामी निवडणुका डोळ्यासमोर ठेवून,न केलेल्या कामाचे श्रेय डिजिटल फलक लावून घेत असल्याची खरमरीत टिका नार-पार योजनेचे तालुक्यातील उद्गाते युवा सामाजिक कार्यकर्ते समाधान पाटील यांनी केली.

       आज शहरातील शासकीय विश्रामगृहात पाटील यांनी त्यांचे या कामात महत्वपूर्ण साथ दिलेल्या सहकारी डॉ.प्रभाकर पवार,डॉ.प्रविण निकम,उदय पाटील यांच्यासह पत्रकार परिषद बोलावली होती.त्यावेळी ते बोलत होते.ते पुढे म्हणाले की,या नार-पार योजनेत आपल्याला केव्हाही जनतेची,विद्यमान भाजप शासनाची मदत घ्यावी लागेल म्हणून आम्ही आमच्या पदाची,राजकीय पक्षाचे नाव ही कुठे येऊ दिले नाही.कारण तालुक्याचा किंबहुना या दुष्काळग्रस्त भागातील शेतकऱ्यांचा पाणीप्रश्न सुटावा हा एकमेव उदात्त हेतू होता,त्यामुळे पाणीप्रश्नाचे राजकारण टाळून प्रामाणिक प्रयत्न केले,मात्र या योजनेचे दृष्टिपथात येऊ लागलेले यश व आगामी निवडणुकांची नांदी बघून विद्यमान लोकप्रतिनिधींना या आयत्या आलेल्या संधीचे सोने करण्याचा मोह आवरला नसल्याचे शहरातल्या डिजिटल फलकबाजीवरून दिसून येत आहे.

         केंद्रीय व राज्यस्तरावरील मंत्री व अधिकारी यांचे समवेत झालेल्या बैठकांचा व मिळालेल्या लेखी आश्वासनांचा लेखा जोखा पाटील यांनी यावेळी सादर केला. आपल्या परिसरातील मोरझर व इतर दहा गावांत सातत्याने दुष्काळी परिस्थिती आहे. याचा शोध घेत २०१७ मध्ये निघालेल्या नांदगावच्या या तरुणांचा प्रवास हवामान खाते ते नार पार पर्यंत येऊन थांबला. पाउस तर पाडता येत नाही. टंकरच्या पाण्यावर शेती होऊ शकत नाही. मग २०१७ मध्ये तहसीलदार, गटविकास अधिकारी, प्रांत यांना साकडे घातले. पण त्याच्या अधिकारांना मर्यादा होत्या. म्हणून ५ ऑगस्ट २०१७ पासून तालुक्यातील गावे, धरणे, नदी, नाले यांचा सर्व्हे केला. सगळे कोरडे ठाक. दरम्यान नार पार या बहुचर्चित योजनेचे पाणी नांदगाव तालुक्याच्या जवळ येऊन त्याला वळसा घालू जाणार आहे. याची माहिती मिळाली आणि चौघा तरुणांनी तडक नागपूर गाठले. २६ नोव्हेंबर २०१७ रोजी केंद्रीय मंत्री नितीन गडकरी यांची भेट घेतली. त्यानंतर त्यांच्या मार्गदर्शनाखाली १८ जाने. २०१८ ला गिरीश महाजन यांच्या दालनात हे तरूण दाखल झाले. राधाकृष्ण विखे पाटील व माजी आमदार अँड.अनिल आहेर यांनी या तरुणांचा उत्साह पाहून त्यांचेसाठी मदतीचा हात पुढे केला.

                  ७ मार्च २०१८ ला विधान परिषदेचे तत्कालीन उपसभापती माणिकराव ठाकरे यांच्या अध्यक्षतेखाली आ. डॉ. सुधीर तांबे यांच्या माध्यमातून उच्च स्तरीय अधिकारी वर्गाची बैठक होऊन सर्व्हेक्षणाचे आदेश देण्यात आले. यावर न थांबता पाटील, दिल्ली य्रेथे गेले. १ मे २०१८ ला गडकरी यांचे कार्यालयातून नांदगावचा नार पार मध्ये समावेश करण्याच्या सूचना व महाराष्ट्राच्या जल संपदा विभागाला केंद्राचे पत्र मिळविले. ३ जून २०१८ रोजी जल संपदा सचिव आय. एस. चहल, ५ जून २०१८ रोजी तापी खोरे कार्यकारी संचालक यांचे समवेत व १३ जुलै रोजी गोदावरी कडवा कालवा नाशिक यांच्याकडे बैठका होऊन पुढील कार्यवाहीसाठी आदेश देण्यात आले.
केवळ आंदोलन करून प्रश्न सुटत नसतात. यावर विश्वास असणारे हे युवक जळगाव, औरंगाबाद, नाशिक, पुणे, मुंबई  येथे अनेकदा गेले. कार्यालयांमधून नकाशे व माहिती मिळवली. त्याआधारे  शासकीय अधिकारी व लोकप्रतिनिधी यांचे समोर नांदगाव तालुक्याची बाजू मांडली. नार पार मधील नांदगावच्या समावेशाची बाजू पक्की केली;.
या पार्श्वभूमीवर नार पारचे पाणी नांदगावकरांच्या  दृष्टी पथात दिसू लागल्याने त्याचे श्रेय मिळविण्याची अहमहमिका सुरु झाली असून हा प्रकार म्हणजे निवडणुका तोंडावर आल्या असताना, न केलेल्या कामाच श्रेय लाटून त्यावर मतांची पोळी भाजण्याचा कार्यक्रम आहे अशा शब्दात समाधान पाटील यांनी विद्यमान आमदारांवर टिकेचा भडिमार केला आहे.