खा.हरिश्चंद्र चव्हाण यांची नाराजी भाजपच्याच पथ्यावर.?

नांदगाव-: संतोष कांदे

मूठभर लोकांची मर्जी सांभाळू न शकल्याने दिंडोरी लोकसभा मतदार संघाचे विद्यमान खासदार हरिश्चंद्र चव्हाण यांचा पत्ता कट झाला आहे.लोकाभिमुख कामे करूनही भाजपच्या वरिष्ठ पातळीवर जोरदार फिल्डिंग लावून चव्हाण यांना दूर सारण्यात आले,व राष्ट्रवादी ने जसे शिवसेनेचे माजी आमदार धनराज महाले यांना गळास लावले,आणि याचा बदला म्हणून की,भाजपने राष्ट्रवादीच्या डॉ.भारती पवार यांना आपल्या गोटात घेवून उमेदवारी बहाल केली.आणि या निमित्ताने शिवसेनेचा एक मोहरा राष्ट्रवादीने फोडला म्हणून भाजप ने हा बदला पूर्ण केला.असे म्हटले तर ते वावगे ठरणार नाही.

     नांदगाव,येवला,कळवण असे सर्वाधिक आमदार राष्ट्रवादीचे असल्याने राष्ट्रवादीला हा मतदारसंघ बारामती नंतर दुसऱ्या क्रमांकाचा सुरक्षित मतदार संघ वाटत असला तरी आजपर्यंत लोकसभेसाठी एकदाही खाते मात्र राष्ट्रवादीला उघडता आलेले नाही.आणि डॉ.भारती पवार यांना गतवेळेस मिळालेली मते व त्यांनी जिल्हा परिषद मध्ये काम करत असताना जमवलेला सर्वपक्षीय जिल्हा परिषद सदस्यांचा गोतावळा ह्यावेळी त्यांना खासदारकीची वस्त्रे नक्की मिळवून देईल.असे राष्ट्रवादीच्या एका अभ्यासू नेत्याने नाव न छापण्याच्या अटीवर सांगितले.म्हणजेच राष्ट्रवादीने ह्या वेळी सुरक्षित मतदार संघात सुरक्षित उमेदवार टाळून पायावर धोंडा मारून घेतला आहे.असा एकंदर सूर या नेत्याचा होता.

     कारण भाजपचे मावळते खासदार चव्हाण यांचा सर्वपक्षीय गोतावळा असल्याचे बोलले जाते.त्यांच्यापर्यंत कामे घेऊन जाणाऱ्या कार्यकर्त्यांना त्यांनी कधीही पक्ष विचारला नाही.यामुळेच ते गेल्या १५ वर्षांपासून या मतदार संघाचे अनभिषिक्त सम्राट बनले होते.दिंडोरी,पेठ,कळवण,सुरगाणा,देवळा,चांदवड,नांदगाव,निफाड,येवला आदी नऊ तालुक्यातील गावांमध्ये काही ना काही कामे त्यांनी केले आहेत.नऊ तालुके असले तरी विधानसभा मतदार संघ मात्र सहा आहेत.

       यात मोडल्या जाणाऱ्या नांदगाव विधानसभेचा विचार करता यात ग्रामीण,शहरी सत्तेत शिवसेनेचा बोलबाला आहे.त्यामुळे डॉ.सौ.पवारांना नांदगाव मधून मोठी रसद मिळणे सहज शक्य आहे.येथील मात्तबर नेते आजच्या घडीला शिवसेनेत आहेत.आणि भाजपातील काही बिनीचे शिलेदार खासदार चव्हाण यांना पक्षाने डावलले म्हणून नाराज असल्याचे बोलले जाते.शिवसेनेचे सर्वेसर्वा सुहास कांदे व बापूसाहेब कवडे भाजपला मदत करायची पण विधानसभेला काही दगाफटका होता कामा नये,असा सूर आळवला आहे.तर काँग्रेसचे येथील प्रमुख नेते तथा माजी आमदार अँड.अनिल आहेर यांनीही आपले पत्ते उघड केलेले नाही.कारण राष्ट्रवादीचे स्थानिक नेते विश्वासात घेत नसल्याचे त्यांचे जुनेच दुखणे आहे.

     आमदार पंकज भुजबळ यांच्यापेक्षा येवल्याचे आमदार माजी मंत्री छगन भुजबळ यांचीच अधिक कसोटी नाशिक सह दिंडोरी मतदार संघात लागली आहे.या दोन्ही जागा मिळवणे आमदार भुजबळांसाठी प्रतिष्ठेचे बनले आहे.आणि यदाकदाचित ह्या दोन्ही जागा पटकावल्या तर भुजबळ नाशिक जिल्ह्याचे पुन्हा एकदा खणखणीत नाणे सिद्ध होणार आहेत.मात्र असे असले तरी नाशिक एकवेळ जिंकता येईल ही दिंडोरी मात्र राष्ट्रवादीसाठी अशक्यप्राय असेच आजचे तरी चित्र आहे.