माणुसकी अजूनही जिवंत आहे.....

नांदगाव-: संतोष कांदे

सरणावर जाताना इतकेच मला जाताना कळले होते ;

मरणाने केली सुटका जगण्याने छळले होते.या उक्तीला तंतोतंत लागू पडेल,अशी परिस्थिती तालुक्यातील ढेकू खुर्द येथील गुरुवारी आत्महत्या केलेल्या मोतीलाल पवार च्या कुटुंबाची आहे.

     घरातील पाच जण अपंग आणि घरात अठराविश्वे दारिद्र्य यामुळे मोतीलाल ने हे टोकाचे पाऊल उचलले.ढोर मेहनत करूनही पोटाला पोटभर अन्न आपण कुटुंबाला छोट्या-छोट्या लेकरांना देऊ शकत नाही.याची सल घेऊन उसतोडीसारखी कठोर मेहनत करत संसाराचा गाडा ओढण्याचा आटोकाट प्रयत्न मोतीलाल करत होता.मात्र जेथे आभाळच फाटले होते,तेथे तो कुठे-कुठे शिवणार.? 

     गरिबांसाठी शासनाच्या अनेक योजना आहेत,मात्र जाचक अटींनी बेसुमार कागदपत्रामुळे ह्या योजना म्हणजे एक दिव्यच आहे." भिक नको पण कुत्रा आवर अशी गत या योजनांची आहे.त्यातल्या त्यात शिक्षणाचा अभाव हे एक या योजनांचा फायदा मिळू न शकण्याचे कारण आहे.पिढीजात परंपरेने आलेले व्यवसाय करत असताना शिक्षणाकडे दुर्लक्ष केले जात असल्याची बाब या तालुक्याला नवी नाही.आणि त्यामुळेच अनेक मोतीलाल आज हयात नाहीत.परिस्थितीला शरण जात जीवनयात्राच संपविण्याचा घातक निर्णय त्यामुळेच घेतला जात असावा. 

     मोतीलाल पवार च्या आत्महत्येची बातमी दै. गांवकरी ने प्रसिद्ध करताच नांदगाव शहरातील युवा फाउंडेशनचे संस्थापक सुमित सोनवणे व सदस्यांनी या कुटुंबाची ढेकू येथे जाऊन भेट घेतली.व या कुटुंबाला सर्वोत्तपरी मदत करण्याचा निर्णय घेतला आहे.त्यासाठी समाजाला ही आव्हान केले आहे.त्याचबरोबर शहरातील प्रसिद्ध उद्योजक व सामाजिक कार्यकर्ते विजय चोपडा यांनीही या तरुणांना साथ देण्याचे ठरवले आहे.या मोतीलाल पवार ची वृद्ध आई,पत्नी,तीन मुले असा परिवार आहे.या कुटुंबाला शासकीय योजनेतून अन्नधान्य व या मुलांच्या शिक्षणाची सोय करण्याचा मनोदय या युवा फाउंडेशन ने व्यक्त केला आहे.त्यासाठी समाजातील दानशूर घटकांनी ही यात सामील व्हावे,असे आव्हान चोपडा व सुमित ने केले आहे.या कुटुंबाला काही मदत करायची असेल तर

१)विजय चोपडा 7020749394

२)सुमित सोनवणे 9767703111

उबेद शेख,निखिल रांगोळे,ऋषि जाधव,विकास शर्मा,प्रसाद वडनेरे,नीलेश पाटील,महेश पेवाल अजय बनसोडे आदी सदस्यांशी संपर्क साधण्याचे आवाहन केले आहे.

प्रतिक्रिया-: जिल्हाधिकारी सूरज मांढरे

या कुटुंबाला अन्नपूर्णा योजनेतून मोफत धान्य देता येईल,व तसा आदेश जिल्हा पुरवठा अधिकाऱ्यांना मी दिला आहे.असे जिल्हाधिकारी सूरज मांढरे यांनी सा. शनैश्वर टाइम्स शी बोलताना सांगितले.