पवारांची पॉवर....अन भुजबळांचे आजही आर्मस्ट्रॉंग

नांदगाव-: संतोष कांदे

मनसे अध्यक्ष राज ठाकरे यांच्या सद्यस्थितीत गाजत असलेल्या 'लाव रे व्हिडिओ' पॅटर्नची माजी उपमुख्यमंत्री आमदार छगन भुजबळ यांनी 'दाखव रे बातमी' त रूपांतर करत शिवसेना -भाजप ची चांगलीच टर उडवली.निमित्त होते.दिंडोरी लोकसभा मतदार संघातील राष्ट्रवादी काँग्रेसचे उमेदवार धनराज महाले यांच्या जाहीर प्रचार सभेचे....

   या सभेत आमदार छगन भुजबळ यांनी सामना दैनिकात शिवसेनेने भाजप विरोधात ज्या काही बातम्या यापूर्वी प्रसिद्ध केल्या आहेत.त्या बातम्यांची कात्रणे सोबत ठेवत उपस्थित जनतेला एकामागून एक कात्रण दाखवत आमदार भुजबळ यांनी या सभेत चांगलीच रंगत आणली.कालच्या सभेनंतर नांदगाव तालुक्यातील वातावरण निवडणूकमय झाले आहे.गावोगावी आमदार छगन भुजबळ यांच्या या क्लृप्तीची जोरदार चर्चा रंगली आहे.

      निवडणूक जाहीर झाल्यापासून अलिप्तवाद स्वीकारलेल्या काँग्रेस नेते माजी आमदार अँड.अनिल आहेर यांची मनधरणी त्यांच्या निवासस्थानी जावून खुद्द राष्ट्रीय नेते तथा माजी केंद्रीय कृषिमंत्री खा.शरद पवार यांनी केल्याने आहेरांचा करिश्मा ही या निमित्ताने दिसून आला आहे.नार-पार योजनेसाठी माजी आमदार अँड.आहेर व तालुकाध्यक्ष समाधान पाटील यांनी कष्ट घेतल्याचे उघड सत्य असताना,आमदार पंकज भुजबळ यांनी ते श्रेय घेण्याचा प्रयत्न केल्याची गोष्ट अँड.आहेरांना चांगलीच खटकली होती.त्यामुळे निवडणूक जाहीर होऊनही ते यापासून दूरच होते.मात्र आता खुद्द खा.शरद पवार यांनी समजूत काढल्याने ते प्रचारात सक्रिय होतील,असे चित्र दिसून येत आहे.

    वास्तविक अँड.आहेर सेक्रेटरी असलेल्या नस्तनपूर देवस्थानचा माजी मंत्री आमदार छगन भुजबळ यांनी भव्य-दिव्य कायापालट केला आहे.त्यामुळे आमदार भुजबळ यांनी जरी आहेर यांची समजूत काढली असती,तरी आहेर वरवर का होईना तयार झाले असते.मात्र भुजबळ यांनी असे न करता खुद्द राष्ट्रीय नेते शरद पवार यांना आहेरांच्या निवासस्थानी दाखल करून एका दगडात दोन पक्षी मारले आहेत.कारण आज निमित्त लोकसभा निवडणुकीचे असले तरी भविष्यात होऊ घातलेल्या विधानसभा निवडणुकीचे इंगित यामागे दडले आहे.

     या नांदगाव विधानसभा निवडणुकीसाठी विद्यमान आमदार पंकज भुजबळ यांना शिवसेनेचे जिल्हाप्रमुख सुहास कांदे यांनी तगडे आव्हान उभे केले आहे.आणि काही दिवसांपूर्वीच हा मतदार संघ राष्ट्रवादीने काँग्रेसला परत द्यावा.अशी मागणी तालुका काँग्रेसने केली होती.मग असे असताना राष्ट्रवादीच्या उमेदवाराला काँग्रेस मदत करेल का.? या बाबत साशंकता निर्माण झाली होती.त्यामुळेच आमदार छगन भुजबळ यांनी खा.शरद पवार यांना माजी आमदार अँड.आहेर यांच्या निवासस्थानी नेवून लोकसभेसह विद्यमान आमदार पंकज भुजबळ यांच्या विधानसभेचा मार्ग मोकळा केला आहे.तसेच या निमित्ताने उमेदवार धनराज महाले यांना ही मोठा दिलासा मिळाला आहे.