तत्कालीन तहसीलदार श्रीमती भारती सागरे यांचा अटकपूर्व जामीन अर्ज फेटाळला.!

नांदगाव -संतोष कांदे

वाहन चालकाने लाचेची मागणी केल्याच्या कारणास्तव लाचलुचपत प्रतिबंधक विभागाकडून यापूर्वीच तहसीलदार यांच्या वाहनचालकावर गुन्हा दाखल होऊन अटक झालेली आहे.आज मालेगाव सत्र न्यायालयाने तत्कालीन तहसीलदार श्रीमती भारती सागरे यांचा ही अटकपूर्व जामीन फेटाळला.

           या बाबत अधिक असे की,मनमाड शहर परिसरात वास्तव्य करून असलेल्या एका व्यक्तीने घरासमोर टाकण्यासाठी मुरूम आणलेला होता.तो नेमका तहसीलदारांच्या नजरेत पडला.आणि त्या व्यक्तीला रितसर दंड ही करण्यात आला.मात्र दंड भरल्यानंतर तत्कालीन तहसीलदार श्रीमती भारती सागरे यांचे वाहन चालक ज्ञानेश्वर कदम (सध्या नियुक्ती आस्थापना विभाग जिल्हाधिकारी कार्यालय नाशिक) यांनी तक्रारदारास भेटून तुमच्यावर भविष्यात कारवाई करू नये,म्हणून 'मॅडम साठी १० हजार व मला २ हजार अशी लाच ३१ डिसेंबर २०१८ रोजी मागितली होती.त्यावेळी तक्रारदाराने नाशिक लाचलुचपत प्रतिबंधक विभागाकडे याची तक्रार केली होती,मात्र एका डब्बे पुरवणाऱ्या व्यक्तीमुळे हा ट्रॅप अयशस्वी झाला.मात्र लाचेची मागणी केल्याचे पुरावे सादर केल्याने तीन महिन्यानंतर गुन्हा दाखल करून अटक करण्यात आली,व त्याला १४ दिवसांची न्यायालयीन कोठडी सुनावण्यात आली होती.

       दरम्यान या संदर्भात तत्कालीन तहसीलदार श्रीमती भारती सागरे (सध्या नगर जिल्हाधिकारी कार्यालय सं.गां.यो.तहसीलदार) यांनी अटकपूर्व जामीन साठी अर्ज दाखल केला,मात्र लाचलुचपत प्रतिबंधक विभागाने भक्कम पुरावे सादर केल्याने श्रीमती सागरे यांचा जामीन अर्ज फेटाळण्यात आल्याची माहिती लाचलुचपत प्रतिबंधक विभागाच्या सूत्रांनी दिली आहे.व एफआयआर मध्ये त्यांचे नाव ऍड करून त्यांना केव्हाही अटक होऊ शकते.अशी माहिती यावेळी देण्यात आली.