पोखरी येथील पाणीपुरवठा योजनेत लाखोंचा भ्रष्टाचार.!

नांदगाव-: संतोष कांदे

तालुक्यातील पोखरी ग्रामपंचायतीने पाणी पुरवठा योजनेत सन २०१३ ते आजतागायत सर्रास भ्रष्टाचार केला असून,याची चौकशी करावी.अशी मागणी अँड. किरण गायकवाड व  ग्रामस्थांनी केली आहे.

       गटविकास अधिकाऱ्यांना दिलेल्या निवेदनात पुढे असे म्हटले आहे की,गावासाठी २००१ ते २००३ या कार्यकाळात माणिकपुंज धरणातून खासदार हरिश्चंद्र चव्हाण यांच्या निधीतून सुमारे ३ लाख ८० हजार रुपये खर्चून पाणी योजना साकारण्यात आली.त्यानंतर सदर योजनेच्या दुरुस्तीसाठी २०१३ मध्ये पुन्हा १० लाख रुपये खर्ची घालण्यात आले.म्हणजेच साधारणतः ४ चार लाख रुपये किंमतीच्या योजनेवर दुरुस्तीसाठी सुमारे १० लाख रुपये खर्चूनही ही योजना सुरळीत चालली नाही.

     विद्यमान सरपंच यांच्या काळातही या योजनेच्या दुरुस्तीसाठी मोठ्या प्रमाणात खर्च दाखवला जात आहे.त्यात पाईपलाईन खोदकाम,पाणीपुरवठा साहित्य खरेदी,यासाठी २०१६ ते आजपावेतो ८ लाख १८ हजार ४२० रुपये खर्ची घालण्यात आले आहेत.तरी या पाणी योजनेचा वनवास संपायला तयार नाही.त्याचबरोबर २००८ ते ०९ या कालावधीत भारत निर्माण योजनेअंतर्गत कोकणवाडा ते मेळाचा बंधारा अशी पाणी पुरवठा योजना साकारण्यासाठी १६ लाख रुपये खर्च करण्यात आले.मात्र ते काम ही अत्यंत निकृष्ट दर्जाचे करण्यात आल्याने ती ही योजना बासनात गेली आहे.

      या पाणीपुरवठा योजनेसाठी आता पर्यंत ३७ लाख ९८ हजार ४२० रुपये खर्ची घालूनही गाव आजही तुषार्त आहे.आजमितीस गावातील पाळीव जनावरे,तसेच ग्रामस्थांच्या पिण्याच्या पाण्याचा प्रश्न बिकट झाला आहे.चांगल्या योजनेची वासलात लावून ग्रामस्थांना पाण्यासाठी वणवण फिरायला लावणाऱ्या विद्यमान ग्रामपंचायत पदाधिकाऱ्यांवर कारवाई करावी अशी मागणी या निवेदनात शेवटी करण्यात आली आहे.यावर अँड किरण गायकवाड यांच्यासह अनेक ग्रामस्थांची नावे व सह्या आहेत.