माणिकपुंज धरणाच्या वाढीव कामासाठी ५२ कोटींचा निधी मंजूर-श्री.पवार

नांदगाव-: संतोष कांदे

तालुक्यातील माणिकपुंज धरणाच्या उर्वरीत कामासाठी सुमारे ५१ कोटी ९२ लक्ष रुपये मंजूर करण्यात आल्याची माहिती जिल्हा परिषदच्या अर्थ व बांधकाम समितीच्या सभापती मनिषा पवार यांचे पती रत्नाकर पवार यांनी नांदगावच्या शासकीय विश्रामगृहात झालेल्या पत्रकार परिषदमध्ये दिली.

   याबाबत अधिक असे की, श्री.पवार यांनी या पत्रकार परिषद मध्ये दिलेल्या माहितीनुसार,दि.५ ऑगस्ट २०१८ रोजी सौ.मनिषा पवार यांनी जलसंपदा मंत्री तथा जिल्ह्याचे पालकमंत्री ना.गिरीश महाजन यांना एका निवेदनाद्वारे माणिकपुंज मध्यम प्रकल्प नाशिक जिल्ह्यातील नांदगाव व जळगाव जिल्ह्यातील चाळीसगाव तालुक्यासाठी वरदान ठरला आहे.त्यामुळे हा प्रकल्प तातडीने पूर्ण करणे गरजेचे असल्याचे मत व्यक्त केले आहे.

  माणिकपुंज मध्यम प्रकल्पाला सन १९९७-९८ मध्ये २८ कोटी ७७ लाख रुपये खर्चाची मंजुरी मिळून काम सुरू करण्यात आले होते.त्यानंतर सुधारित प्रशासकीय मान्यता सन २००७-८ मध्ये ५२ कोटी ९२ लाख रुपये खर्चाची मान्यता देण्यात आली.त्यात या मध्यम प्रकल्पाचे जवळपास ६१ टक्के काम पूर्ण करण्यात आले आहे असून,३९ टक्के काम अपूर्ण असल्याचे म्हटले आहे.त्यामुळे या उर्वरीत कामासाठी १२४.०६ कोटी रुपयांच्या खर्चास मंजूरी द्यावी अशी मागणी सौ.मनिषा पवार यांनी पालकमंत्री ना.महाजन यांच्याकडे केली होती.

    या पत्रावर कार्यवाही करत राज्याच्या जलसंपदा विभागाने या मध्यम प्रकल्पाच्या पूर्णतेसाठी सुमारे ५१.९२ कोटी रुपयांच्या खर्चास मंजुरी देण्यात आली असल्याची माहिती श्री.पवार यांनी या पत्रकार परिषद मध्ये दिली.तसेच यावेळी बोलताना पवार यांनी या मन्याड नदीवर ठिकठिकाणी साखळी पद्धतीचे बंधारे बांधून संपूर्ण पूर्वभाग थेट चाळीसगाव तालुक्यापर्यंत बारामही बागायत करण्याचा मनोदय व्यक्त केला.तसेच नांदगाव शहर व ५६ खेडी प्रादेशिक योजना कालबाह्य झाल्याने या योजनेच्या पुनर्जीवनासाठी सुमारे १२० कोटी रुपयांचा निधी मंजूर करून आणला आहे.त्या कामाचा शुभारंभ ही येत्या ३१ मे च्या आसपास केला जाईल.अशी माहिती यावेळी दिली.श्री.पवार व सौ.मनिषा पवार यांच्या या कामाबाबत पूर्व भागातील शेतकऱ्यांनी समाधान व्यक्त केले आहे.

         दरम्यान माजी जिल्हा परिषद सदस्य रत्नाकर पवार यांनी घेतलेल्या या पत्रकार परिषदेबाबत स्थानिक भाजप नेत्यांनी आक्षेप नोंदवले आहेत.भाजप जिल्हाध्यक्ष दादासाहेब जाधव यांनी सांगितले की,श्री.पवार यांना याबाबत समज देण्यात येईल.तर तालुकाध्यक्ष दत्तराज छाजेड यांनी जिल्हाध्यक्ष दादासाहेब पवार यांच्याशी बोलून निर्णय घेऊ असे सांगितले.तर भाजप नेते तथा माजी आमदार संजय पवार यांनी रत्नाकर पवार यांच्या या कृतीवर कडक शब्दात ताशोरे ओढले आहेत.