भाजप उमेदवार डॉ.भारती पवार यांच्या विरोधात आचारसंहिता भंगाची तक्रार दाखल.!

नांदगाव-: संतोष कांदे

मतदानाच्या पूर्वसंध्येला भाजपच्या उमेदवार डॉ.भारती पवार यांनी जी साडी परिधान केली होती,त्यावर कमळ चित्राची नक्षी असल्याने हा आदर्श आचारसंहिता भंग असल्याची तक्रार युवक काँग्रेसच्या प्रदेश सचिव कल्याणी रांगोळे यांनी केली आहे.

  या बाबत अधिक असे की,दि.२९ रोजी सायंकाळी पाच वाजता प्रचार करण्याची मुदत संपल्यानंतरही दिंडोरी लोकसभा मतदार संघातील भाजपच्या उमेदवार डॉ.भारती पवार ह्या नांदगाव तालुक्यात प्रचार करत असल्याचे दिसून येत होत्या,व त्यांनी यावेळी जी साडी परिधान केली होती,त्यावर कमळ या भाजपची निशाणी असलेल्या फुलाची नक्षी स्पष्ट दिसून येत होती.आणि हा आदर्श आचारसंहितेचा भंग असल्याचे कु.रांगोळे यांचे म्हणणे आहे.

  सदर तक्रार दाखल करून घेण्यास नांदगाव तहसील कार्यालयातील संबंधित निवडणूक कामाशी संबंधित कर्मचारी व अधिकाऱ्यांनी टाळाटाळ केली,मात्र अधिक आग्रह धरला असता त्यांनी नगरपालिकेत तक्रार नोंदवण्याची सूचना सायंकाळी उशिरा केली.तेव्हा नांदगाव नगरपालिकेत दुसऱ्या दिवशी दि.३० रोजी तक्रार नोंदवण्यात आली.यावेळी नगरपालिका प्रशासनाने ही ऑनलाइन तक्रार करण्याचा अनाहूत सल्ला अगोदर देण्याचा प्रयत्न केला,मात्र तक्रारदार बधत नसल्याचे बघून त्यांनी तक्रार दाखल करून घेतली आहे.