अखेर त्या सापाला जेरबंद करण्यात यश....

नांदगाव -: संतोष कांदे

तालुक्यातील जळगाव बुद्रुक प्रातर्विधीसाठी बाहेर गेलेल्या ३७ वर्षीय महिलेचा विषारी सर्पदंशाने मृत्यू झाल्याची घटना काही दिवसांपूर्वी घडली होती.या घटनेच्या चार-पाच दिवसातच या सर्पाने त्याच कुटुंबाच्या बकरीला ही दंश केल्याने बकरीचा ही मृत्यू झाला होता.आज त्या सर्पाला पकडण्यात यश आले.

          याबाबत अधिक असे की,येथील काळू बुरकुल या शेतकऱ्याची पत्नी सौ.मंदाबाई (वय-३७) ह्या दि.११ रोजी रात्री साडे नऊ वाजेच्या सुमारास बाहेर गेल्या होत्या.त्यांना तेथे पायाला काहीतरी टोचल्याचे जाणवले,मात्र मुंगळा किंवा अन्य कीटक चावले असेल म्हणून त्यांनी दुर्लक्ष केले.त्यानंतर घरातील सर्वांनी एकत्र जेवण केले,व झोपल्यानंतर त्यांना त्रास होऊ लागल्याने जाणकार व्यक्तींनी हा सर्पदंश असल्याची कल्पना दिल्याने त्यांना नांदगाव ग्रामीण रुग्णालयात दाखल करण्यात आले होते.

    वैद्यकीय अधिकारी डॉ.रोहन बोरसे यांनी ही जखम बघताच अत्यंत विषारी मण्यार नामक सापाने दंश केला असल्याचे निदान करून सौ.मंदाबाई यांच्यावर तातडीने उपचार सुरू केले होते.मात्र उपचार सुरू केल्याच्या अवघ्या पाच मिनिटातच त्यांचा मृत्यू झाला होता.

       गेल्या दोन महिन्यांपूर्वी हाच साप मयत मंदाबाई यांना घराजवळ आढळून आला होता.त्यावेळी गावातील सर्पमित्र प्रभाकर निकुंभ यांना पाचारण करण्यात आले होते.मात्र हा साप गुंगारा देण्यात यशस्वी झाला होता.या महिलेचा बळी घेतल्यानंतर याच सापाने बकरीचा ही बळी घेतला.तेव्हा सर्पमित्राला पुन्हा बोलावण्यात आले.ह्यावेळेस मात्र ह्या सापाला मोठ्या महत्प्रयासाने जेरबंद करण्यात सर्पमित्र निकुंभ यांना यश आले.

जळगाव बुद्रुक ता.नांदगाव-सापाला पकडल्यानंतर पाणी पाजताना सर्पमित्र प्रभाकर निकुंभ, (छायाचित्र-संतोष कांदे)