जुन्या दस्तावेजांचे संगणकीकरण

नांदगाव -: वार्ताहर

वडिलोपार्जित संपत्तीवरून भावा-भावात होणारे वाद मिटवण्यास गेल्या ११७ वर्षांपासून सहाय्यभूत होणारे जुने दस्तावेज कालौघात जीर्ण होत चालल्याची बाब हेरून राज्यशासनाने ह्या दस्तावेजांचे संगणकीकरण केले.येत्या काही दिवसात जनतेला आवश्यक जुने दस्तावेज खाजगी सायबर कॅफेवर ही मिळू लागतील अशी माहिती अभिलेख कक्षाचे लिपिक अशोक जाधव यांनी दिली.

    याबाबत मिळालेल्या माहितीनुसार,सन १९१२ पासून उपलब्ध असलेल्या या दस्तावेजमध्ये सातबारा,व त्यावरील सर्व खरेदी-विक्री च्या नोंदी,फेरफार च्या नोंदी,जन्म-मृत्यूच्या नोंदी,६ ड चे पत्रक,क.ड. ई. पत्रक,इनामपत्रक,असे संपत्ती संदर्भातील महत्वाचे दस्तावेज शासन गेल्या ११७ वर्षांपासून जतन करत आहेत.आणि गेल्या काही वर्षांपासून ह्या दस्तवजाचे कागद अत्यंत जीर्ण झाल्याने त्याची सत्यप्रत देणे अशक्यप्राय बाब झाली होती.त्यामुळे जनता व प्रशासन यांच्यात वादावादीचे प्रसंग वरचेवर होऊ लागले होते.

      गेल्या एक ते दीड वर्षांपासून शासन आदेशानुसार ह्या दस्तावेजांचे संगणकीकरण करणे सुरू करण्यात आले.तर त्यात नांदगाव तालुक्यातील सर्व जुन्या दस्तावेजांचे संगणकीकरण पूर्णत्वास गेल्याची माहिती तहसीलदार मनोज देशमुख यांनी दिली.तसेच जनतेला शासकीय कार्यालयात न येता बाहेरील खाजगी सायबर कॅफे मधून हे दस्तावेज देण्याचा उपक्रम प्रायोगिक स्वरूपात विदर्भातील अनेक जिल्ह्यात सुरू करण्यात आला असून,नाशिक जिल्ह्यात ही हा उपक्रम येत्या सहा महिन्यांत सुरू होईल अशी शक्यता आहे.

     यापूर्वी जीर्ण झालेल्या दस्तावेजांचे अवशेष नक्कल प्रत म्हणून देण्याच्या परिस्थितीत नसेल तर लेखी उत्तर देण्याचा नियम अलीकडच्या काळात राबवला जात होता.मात्र जीर्ण झालेल्या दस्तावेजांचे तुकडे जोडून फोटोकॉपी द्वारे त्या दस्तावेजाला पुनर्जीवित करण्यात आले आहे.