कांदा व मकाने शेतकऱ्यांना केले लखपती

नांदगाव-: संतोष कांदे

गेल्या दुष्काळच्या वणव्यात भरडलेल्या शेतकऱ्यांना यंदाच्या पावसाने खरीप हंगामात थोडासा ; मात्र रब्बी हंगामात चांगलाच दिलासा दिल्याचे चित्र दिसून येत आहे.रब्बी हंगामातल्या शेतकऱ्यांना 'कांदा' पिकाने लखपती केले आहे,तर काही शेतकऱ्यांना खरीप हंगामातल्या 'मका' पिकाने ही लखपती केले आहे.काल एका दिवसातल्या मका व कांदा विक्रीतून येथील शेतकऱ्यांना सुमारे ५ कोटी ४३ लाख रुपयांची कमाई झाली.

       गेल्या दुष्काळात नगदी पिकात गणल्या जाणाऱ्या कांदा, मका,आणि कपाशी पिकाने साफ निराशा केली होती.अत्यंत तुटपुंजे उत्पन्न मिळाल्याने उत्पादन खर्च ही सुटणे मुश्किल झाले होते,उधार,उसनवारी,किंवा बँकांकडून घेतलेली पिके कर्जे ही शेतकरी फेडू शकले नव्हते.परिणामी जगाचा हा पोशिंदा बळीराजा कर्जाच्या घाईत लोटला गेला होता.आणि या दुष्काळाची दखल घेऊन शासनाने पावसाळ्याला अगदी काही दिवस बाकी असताना चारा छावण्या सुरू करण्यात येऊन तुटपुंजा दिलासा देण्याचा प्रयत्न केला गेला होता.

      ह्या वर्षी पावसाची सुरुवात चांगली झाली होती,मात्र पिके हातात पडण्यागोदरच भरमसाठ पडलेल्या पावसाने तोंडचा घास पळवला.त्यामुळे 'दैव देते कर्म नेते' अशी गत नांदगाव तालुक्यातील शेतकऱ्यांची झाली होती.मात्र ह्याच खरीप हंगामातील मका पिकाची प्रत घसरलेली असताना ही चांगल्या भावामुळे कसर भरून निघण्यास मदत झाली.यापूर्वी जो भाव चांगल्या मकाला मिळत होता,मात्र वाढलेल्या भावामुळे प्रत घसरलेल्या मका पिकाला ही किमान-१४९१ ,कमाल-१९४२, तर सरासरी-१८८५ रुपये भाव सध्या मिळत आहे.त्यामुळे शेतकऱ्यांना बऱ्यापैकी अर्थार्जन झाले.काल नांदगाव कृषी उत्पन्न बाजार समिती व न्यायडोंगरी,बोलठाण या उपबाजार समिती कार्यक्षेत्रात २९१ वाहनांतून ५ हजार ८२० क्विंटल मका विक्रीस आला होता.त्यास किमान-१४९१ रुपये प्रति क्विंटल,कमाल-१९४२,तर सरासरी-१८८५ रुपये भाव मिळाला.या मका विक्रीतून शेतकऱ्यांना १ कोटी ४७ लाख ६ हजार रुपये प्राप्त झाले,तर रब्बी हंगामासाठी सर्वच जलस्रोतांमध्ये भरपूर जलसाठा असल्याने रब्बी हंगाम चांगला साधला असल्याचे दिसून येत आहे.नांदगाव कृषी उत्पन्न बाजार समिती व बोलठाण उपबाजार समितीमध्ये लाल (पोळ व रांगडी) कांदा पिकाची  सुमारे ८३५ वाहनांतून १२ हजार ५२५ क्विंटल कांदा विक्रीस आला होता,या लाल कांद्यास कमाल-४२०१ रुपये प्रति क्विंटल,किमान-१००० रुपये,तर सरासरी-३५०० रुपये भाव मिळाला.या कांदा विक्रीतून ही शेतकऱ्यांना काल (दि.७ ) रोजी सुमारे ४ कोटी ३८ लाख ३७ हजार ५०० रुपये प्राप्त झाले आहेत.

       काल जवळपास एकट्या नांदगाव तालुक्यात ५ कोटी ४३ लाख १३ हजार ५०० रुपयांची उलाढाल होऊन नांदगाव कृषी उत्पन्न बाजार समितीला ही या वाढलेल्या भावाचा चांगलाच फायदा झाल्याचे दिसून आले.एका दिवसात बाजार समितीला ही सुमारे ५ लाख ४३ हजार १३५ रुपये इतकी बाजार फी जमा झाली.

प्रतिक्रिया-: अमोल खैरनार-:

 सभापती तेज कवडे व संचालक मंडळ यांच्या मार्गदर्शनाखाली आमच्या बाजार समितीचे प्रशासन शेतकऱ्यांच्या प्रश्नांवर सजग आहे,मग विक्री केलेल्या शेतमालाचे पैसे रोख मिळण्याचा विषय असो वा व्यापाऱ्यांच्या खळ्यावर शेतकऱ्यांना कुठलाही त्रास होऊ न देण्याचा...याबाबत बाजार समिती काळजीपूर्वक पाऊले उचलत आहे.

नांदगाव-: येथील कृषी उत्पन्न बाजार समितीत विक्रीसाठी दाखल झालेली कांदा व मका पिकाची वाहने.(छाया-संतोष कांदे)