बक्कल क्रमांक-१४५२....अन अश्रूंचा बांध फुटला.....

नांदगाव-: संतोष कांदे

बक्कल क्रमांक-१४५२....एक महिला पोलीस कर्मचारी....ग्रामीण रुग्णालयाचे वैद्यकीय अधीक्षक डॉ.रोहन बोरसे यांचा बदली निमित्त निरोप समारंभ....सर्वांची भाषणे झाली.अध्यक्षीय भाषण बाकी असताना सदर महिला पोलीस कर्मचारी उठली,व्यासपीठाजवळ गेली.अन बोलायला सुरुवात करताच ; तिच्या अश्रूंचा बांध फुटला...तोंडातून शब्द निघेना...फक्त अन फक्त अश्रू.....

       नांदगाव ग्रामीण रुग्णालयाचे वैद्यकीय अधीक्षक डॉ.रोहन बोरसे यांची तब्बल दहा वर्षानंतर या तालुक्यातून नाशिक जिल्हा रुग्णालयात बढतीवर बदली झाली आहे.त्या निमित्त तालुकाभरात त्यांचा निरोप समारंभ साजरा झाला.

    नांदगाव पोलीस स्टेशनमध्ये ही कृतज्ञता म्हणून डॉ.बोरसे यांचा निरोप समारंभ साजरा करण्यात आला.यावेळी सदर महिला पोलीस कर्मचारी (बक्कल-क्रमांक-१४५२) हिने स्वतः हुन बोलण्याची अपेक्षा व्यक्त केली.व व्यासपीठावर येऊन बोलायला सुरुवात करताच ,तिच्या अश्रूंचा बांध फुटला.अन तिला बोलताच येईना...तेव्हा डॉ.बोरसे यांनी याचा उलगडा केला.सदर महिला पोलीस कर्मचारी कोरोना पॉझिटिव्ह झाली,तेव्हा ती सहा महिन्यांची गर्भवती होती.अन परिस्थिती अत्यंत गंभीर झाली.नॉर्मल डिलिव्हरी शक्य नसल्याने सीझर करण्याचा निर्णय घेण्यात आला.तेव्हा डॉ.बोरसे यांनी सदर बाळंतपण कायम लक्षात रहावे म्हणून या  पोलीस कर्मचारी असलेल्या महिलेचा बक्कल नंबर विचारला.तो १४५२ असल्याचे सांगितल्यानंतर या महिलेची २ वाजून ५२ मिनिटांनी डिलिव्हरी करण्यात आली.

      तर यावेळी बोलताना मनमाडचे पोलीस अधीक्षक समीरसिंह साळवे म्हणाले की,ज्यावेळी माझा रिपोर्ट पॉझिटिव्ह आला.तेव्हा मी घरात जाण्याऐवजी बाहेर बसून होतो,तेव्हा डॉ.बोरसे यांना कळताच,ते घरी आले अन मला तपासले.तेव्हा त्यांच्या तोंडावर मास्क ही नव्हता.तेव्हा माझे कुटुंबीय ही आश्चर्यचकित झाले.अन माझा ही उत्साह वाढून मी अत्यंत कमी दिवसात बरा झालो.तर पोलीस उपनिरीक्षक श्री.आहिरे यांची तब्येत अत्यंत गंभीर झाली होती.त्यांना नाशिक येथे हलवण्याची तयारी करण्यात आल्यानंतर त्यांनी नकार दिला.डॉ.रोहन बोरसे यांच्याकडेच मी उपचार घेणार.अशी भूमिका घेतली.अशा अनेक घटना उलगडून सांगत डॉ.बोरसे यांना नांदगाव पोलीस स्टेशनच्या वतीने अत्यंत भावनिक वातावरणात निरोप देण्यात आला.यावेळी जमलेले सर्व नागरिक भावनिक झाले होते.