ताजी बातमी नांदगाव-औरंगाबाद मार्गावर वाहतूक ठप्प.! वाहनांच्या लांबच लांब रांगा लागल्या,प्रवासी वर्गाचे हाल.

नांदगाव-: वार्ताहर

नांदगाव-औरंगाबाद मार्गावरील कासारी (ता.नांदगाव) पासून ते तलवाडा (ता.वैजापूर) पर्यंत वाहतूक ठप्प झाली असून,औरंगाबादकडे जाणाऱ्या व नांदगाव कडे येणाऱ्या प्रवासी वर्गाचे अडकून पडल्याने हाल होत असल्याचे दिसून येत आहे.

       काही दिवसांपूर्वी कन्नड (जिल्हा औरंगाबाद) घाटात दरड कोसळल्याने ती वाहतूक चाळीसगाव नांदगाव व्हाया औरंगाबाद या मार्गाने वळवण्यात आली आहे.आणि या मार्गावर अचानक इतक्या मोठ्या प्रमाणात वाहतूक सुरू झाल्याने अगोदरच खड्ड्यांचा असलेला हा रस्ता अत्यंत खराब झाला आहे.खड्ड्यांची संख्या मोठ्या प्रमाणात वाढली आहे,आणि सतत पडत असलेल्या पावसामुळे यात भर पडत आहे.

        या मार्गावर कासारी गावाची हद्द संपल्यानंतर तलवाडा घाट लागतो,या घाटात तर अरुंद रस्ता अन त्यात महाकाय खड्डे यामुळे येथे सतत वाहतूक ठप्प होण्याचे प्रमाण वाढले आहे.यामुळे तातडीच्या कामासाठी अथवा वैद्यकीय कारणासाठी या मार्गावरून प्रवास करणाऱ्या प्रवासी वर्गाचे हाल होत आहेत.