नांदगाव तालुक्यासाठी आमदार कांदे यांची थेट उच्च न्यायालयात धाव.!

नांदगाव-: वार्ताहर

राज्याचे अन्न व नागरी पुरवठा मंत्री, राष्ट्रवादी काँग्रेसचे नेते,जिल्ह्याचे पालकमंत्री तथा ओबीसी समाजाचे आधारस्तंभ यासह अनेक उपाधी प्राप्त असलेले ना.छगन भुजबळ नांदगाव तालुक्याबाबत दुजाभाव का करत आहेत.? असा प्रश्न तालुक्यातील जनतेला पडला आहे,आणि या प्रश्नाचे उत्तर शोधण्यासाठी अखेर आमदार सुहास कांदे यांना उच्च न्यायालयात धाव घ्यावी लागली आहे.यामुळे तालुक्यात अनेक चर्चा झडू लागल्या आहेत.

      दि.११ रोजी नांदगाव तहसील कार्यालयात पालकमंत्री ना.भुजबळ व आमदार कांदे यांच्यात नियोजन मंडळाच्या निधीवरून जो कलगीतुरा रंगला तो अवघ्या महाराष्ट्राने बघितला.त्यानंतर त्यांच्यात दिलजमाई झाल्याच्या बातम्या ही प्रकाशित झाल्या.मात्र हे अळवावरचे पाणी ठरले.

     पुत्र पंकज यांचा पराभव पालकमंत्री अजूनही पचवू शकले नाहीत.आणि त्यामुळेच ते नांदगाव तालुक्याचे आमदार सुहास कांदे यांच्या नांदगाव मतदार संघाला निधी देण्यास हात आखडता घेत असल्याचे चित्र आता सर्वश्रुत झाले आहे.यामुळे आमदार सुहास कांदे यांनी उच्च न्यायालयात धाव घेऊन पालकमंत्री ना.छगन भुजबळ हे नांदगाव तालुक्यासाठी आलेली कामे मर्जीतील ठेकेदार तसेच समता परिषद चे कार्यकर्ते यांना टक्केवारी च्या मोबदल्यात विकून येवल्यात ती कामे करून घेत असल्याचा आरोप केला आहे. 

प्रतिक्रिया-: 

सुहास कांदे आमदार नांदगाव विधानसभा मतदार संघ

माझा वाद हा नांदगावकरांच्या विकासाकरीता आहे.जिल्हा नियोजन समिती (डीपीडीसी) अंतर्गत दिला जाणारा निधी हा समसमान वाटप न करता ना. पालकमंत्री महोदय येवला मतदारसंघात व त्यांच्या मर्जीतील लोकांना त्यांच्या पदाचा गैरवापर करून देत आहेत.त्यांनी ८० कोटी रूपये पेक्षा जास्तीचा निधी हा येवला मतदार संघाकरीता घेतला आहे.व माझ्या नांदगाव मतदार संघाकरीता अत्यंत तुटपुंजा निधी दिला आहे.शासनाकडून परिपत्रक क्रमांक डीएपी १०१३/प्र. क्र.२७७/का.१४८१ दिनांक २८ जून २०१३ च्या परिपत्रकानुसार निधी मंजूर करण्याचे अधिकार जिल्हा नियोजन समितीच्या बैठकीत सर्वांनी सर्वानुमते मंजूर करावा असे आहे. तसेच सर्वच तालुक्यांना समसमान निधी वाटप करावा लोकप्रतिनिधींच्या पत्रांचा, सूचनांचा आदर करावा असा स्पष्ट शासन निर्णय आहे मी आमदार असून जिल्हा नियोजन समितीचा सदस्य आहे. त्यानुसार तसा माझा अधिकार आहे मी फक्त माझ्या अधिकाराचा वापर करत असून त्यांना सांगतो आहे की माझ्या मतदारसंघात निधी द्यावा माझा वाद वैयक्तिक नसून तात्विक आहे. शासन निर्णयाप्रमाणे मला निधी द्यावा हीच माझी मागणी आहे.माझ्या नांदगाव विधानसभेच्या विकासाकरिता त्यांच्या हक्काचा निधी इतरत्र वळविला जातो आहे ती माझ्या उघड्या डोळ्यांनी बघू शकत नाही माझ्या नांदगावकरांचा निधी मी इतरत्र वळवू देणार नाही. माझ्या नांदगाव मतदार संघाच्या विकासाकरता मी कटिबद्ध आहे. भविष्यात हि कटिबद्ध राहील आणि संघर्ष करण्याची गरज पडली तर संघर्ष हि करेन पण नांदगाव मतदारसंघाचा विकास करेन.