आमदार कांदे यांचा बोलवता धनी कोण.? या लेखातून ना.भुजबळ यांची पाठराखण की बदनामी.?

नांदगाव-: वार्ताहर

'आमदार कांदे यांचा बोलावता धनी कोण.? असा प्रश्न करत मंत्री ना.भुजबळ यांच्या समर्थनार्थ एक पोस्ट सोशल मीडियात चांगलीच व्हायरल झाली आहे.मात्र या पोस्टमध्ये आमदार कांदे यांनी जे आरोप केले आहेत,ते आरोप खोडून काढण्याऐवजी कांदे यांचे आरोप खरे असल्याची पुष्टी अनेक उदाहरणातून देण्यात आली आहे.त्यामुळे ना.भुजबळ यांना बळ मिळण्याऐवजी बदनामी होण्याची शक्यता अधिक निर्माण झाली आहे.

     राज्यात सत्तेवर असलेल्या महाविकास आघाडीतले प्रमुख नेते तथा अन्न व नागरी पुरवठा मंत्री,नाशिक जिल्ह्याचे पालकमंत्री ना.छगन भुजबळ व नांदगाव विधानसभा मतदार संघातील शिवसेनेचे आमदार सुहास कांदे यांच्यातला विकासकामांच्या निधीवरूनचा वाद मंत्रिमंडळासमोर न जाता थेट हायकोर्टात जाऊन पोहचल्याने भुजबळ समर्थक कार्यकर्ते सैरभैर झाले आहेत.आणि यातून मग भावनेच्या लाटेवर स्वार होत ; कुठलाही सारासार विचार न करता लोक सोशल मीडियातून व्यक्त होत आहेत.वरील पोस्ट मध्ये ना.भुजबळ यांचे समर्थन करताना संबंधितांने ते ज्या राष्ट्रवादी काँग्रेस पक्षाचे नंबर एकचे नेते असताना राष्ट्रवादी पक्षाच्या काही नेत्यांनी ना.भुजबळांना आमदार श्री.कांदे यांच्या माध्यमातून अडचणीत आणण्याचा प्रयत्न केला असावा.अशी शंका घेऊन राष्ट्रवादी त्यांची पाठराखण करेल याला खो घातला आहे.

      नाशिक जिल्ह्यात राष्ट्रवादीचे सहा आमदार आहेत.ह्या आमदारांनी ना.भुजबळ यांचे समर्थन न केल्याचा मुद्दा घेऊन भविष्यात हे आमदार ना.भुजबळ यांच्यापासून दूर कसे जातील याची तजवीज केल्याचे दिसून येत आहे.त्यानंतर ना.भुजबळ हे मनमानी पद्धतीने कामकाज करतात.हे सिद्ध करण्यासाठी 

** ** ** ** ** ** ** **

(पोस्ट मधील उल्लेख जसाच्या तसा)  -:पालकमंत्री ना.छगन भुजबळ यांनी जिल्ह्याचे "अनभिषिक्त सम्राट" म्हणूनच कारभार हाताळला, स्वपक्षातच नव्हे तर अन्य पक्षात ही भुजबळ यांचा दबदबा होता, त्यांच्या विरोधात 'ब्र' शब्द काढण्याची हिंमत नव्हती. अशी वाक्यरचना करण्यात आली आहे.

**     **    **   ** 

         त्यानंतर राष्ट्रवादी काँग्रेसच्या अन्य नेत्यांवर संशय घेताना पुढे असे म्हटले की, आ. कांदे हिम्मतवान असले तरी थेट ना. भुजबळ यांच्या विरोधात दंड धोपटणे सोपे नाही, ना. भुजबळ यांच्या विरोधात उघड भूमिका घेण्याची हिंमत आ. कांदे यांना कोणी दिली? आ. कांदे यांच्या खांद्यावर ना. भुजबळ यांच्या विरोधात कुणी बंदूक ठेवली? ना. भुजबळ यांच्या विरोधात स्वपक्षीयांसह अन्य पक्षीय काही षडयंत्र रचत आहेत का? असे प्रश्न उपस्थित होत आहेत.या पद्धतीने स्वतःच्या पक्षाविषयी ही संशयाचे वलय निर्माण करण्यात आले आहे.

           **    **     **     **

         आमदार सुहास कांदे हायकोर्टात गेले असले तरी काही ठिकाणी त्यांना क्लीनचिट ही देण्यात आली आहे.त्यात असे म्हटले आहे की,"खरे तर ना. भुजबळ आणि आ. कांदे यांच्यात अगदी पंकज भुजबळ यांचा पराभव झाला तरी टोकाचे मतभेद कधीच नव्हते, ज्या ना. भुजबळ यांनी ठाकरे कुटुंबियांसोबतचे मतभेद संपुष्टात आणले, ते ना. भुजबळ आ. कांदे यांच्याशी तुटे पर्यंत ताणतील ही शक्यता फारच कमी, ना. भुजबळ एवढे परिपक्व नेते निश्चितच आहेत, शिवाय दोघेही ओबीसी समाजाचे आहेत, आ. कांदे अडचणीत असतांना ना. भुजबळ यांनी त्यांना मदतच केली आहे, आ. कांदे यांनाही ही जाणीव आहे, अशा स्थितीत आ. कांदे यांनी ना. भुजबळ यांच्या विरोधात टोकाची भूमिका तीही त्यांनी हाती घेतलेला मुद्दा फारसा वादाचा नसतांना का घेतली हा प्रश्न आहे, म्हणूनच वरील प्रश्न उपस्थित होतात.

            **      **     **     **

         पुढे लिहताना संबधिताने ना.भुजबळ यांच्यावर आमदार श्री.कांदे यांनी जे निधी विकल्याचा आरोप केला आहे,त्या आरोपाला पुष्टी करताना असे म्हटले आहे की, मुळातच एखादया मंत्र्याने,आमदाराने, खासदाराने, गेला बाजार महापौर, सरपंचाने आपल्या पक्षाच्या ठेकेदार कार्यकर्त्यांना आपल्या पदाचा उपयोग करून आणि पक्षाचा कार्यकर्ता नसला तरी एखादया मर्जीतल्या ठेकेदाराला काही कामे देणे हे काही नवीन नाही, सत्ता कोणत्याही पक्षाची असली तरी हे होतेच, सध्या ही केंद्र सरकार आपल्या मर्जीतील मोजक्याच ठेकेदार, उद्योगपतींना काम देत असल्याचे आरोप होतच आहेत, 

               **    **     ** **

       आणि इतक्यावरच न थांबता संबंधितांने ना.भुजबळ येवल्याला झुकते माप देतात या आरोपाची ही पुष्टी करून दिली आहे.ती अशी मर्जीतल्या ठेकेदारांना ना. भुजबळ कामे देतात, या आरोपबरोबरच आ. कांदे यांनी आणखी एक आरोप केला तो म्हणजे ना. भुजबळ यांच्या येवला मतदारसंघात कोट्यवधी रुपयांची कामे सुरू असल्याचा हेही साहजिकच आहे,"तळे राखील तो  पाणी चाखील" ही म्हण राज्यकर्त्यांना ही लागू होते, यावरून अनेकदा आरोप-प्रत्यारोप ही होतात, 

                **     **      **      **

        राष्ट्रवादी काँग्रेसवर आरोप ही याच पोस्ट मध्ये करण्यात आला आहे.तो असा 

     "राष्ट्रवादी काँग्रेस व भारतीय जनता पक्ष एकत्र येण्याची शक्यता अनेकदा वर्तविली जाते, पण ज्या पक्षाच्या नेत्यांनी आपल्याला कारागृहात डांबले, जो पक्ष ओबीसी वर्गाच्या आरक्षणासह अनेक सवलतींच्या विरोधात असू शकतो, त्या पक्षाबरोबर आघाडी करण्यात भुजबळ अडसर ठरू शकतात, आणि म्हणूनच ना. भुजबळ यांच्या विरोधात स्वपक्षातूनच षडयंत्र रचले जाऊ शकते,ही आणखी एक शक्यता,त्यातच जिल्ह्यातील सर्वच आमदारांना ना.भुजबळ यांनी कितीही मदत केली तरी ते अडचणीचे वाटतात, कारण या आमदारांची राजकीय वाढ ना. भुजबळ यांच्यामुळे खुंटते, त्यांना मर्यादा येतात ना. भुजबळ म्हणजे सबकुछ असे तयार झालेले समीकरण जिल्ह्यातील आमदारांसाठी अडचणीचे ठरते, म्हणूनच आ. कांदे यांनी केलेल्या आरोपांनंतर जिल्ह्यातील राष्ट्रवादी काँग्रेसचा एकही आमदार ना. भुजबळ यांच्या समर्थनार्थ पुढे आला नाही, ना. भुजबळ हे मुख्यमंत्री उद्धव ठाकरे यांच्या बऱ्यापैकी 'गुड बुक' मध्ये आहेत, त्यामुळे यदाकदाचित ते शिवसेनेत आलेच तर आपले काय हा प्रश्न शिवसेना नेत्यांना सतावत असावा, हे ही एक कारण ना. भुजबळ यांची कोंडी करण्यामागे असावे.

         अशा पद्धतीने ही पोस्ट ना.भुजबळ यांना मदत कमी पण अडचणीची अधिक ठरणार आहे.