'साहेब' तुम्ही चुकलात.!

साहेब' तुम्ही चुकलात...!

नांदगाव-: संतोष कांदे

एकेकाळी राज्याचे 'हेवीवेट' नेते अशी ओळख निर्माण केलेल्या ; व सद्यस्थितीत अन्न व नागरी पुरवठा मंत्री तथा जिल्ह्याचे पालकमंत्री ना.छगन भुजबळ यांनी नांदगाव तालुक्यात अतिवृष्टी झाल्याच्या  निमित्ताने जो शासकीय दौरा केला,आणि या दौऱ्यात ज्या संकुचित वृत्तीचे दर्शन घडवले,त्यामुळे अवघा वंजारी समाज दुखावला गेला आहे..त्यामुळे 'साहेब' तुम्ही चुकलात अशीच भावना प्रत्येक वंजारी समाज बांधवांची झाली आहे.

      काँग्रेसचा बालेकिल्ला असलेला हा नांदगाव विधानसभा मतदार संघ सिन्नर च्या बदल्यात २००९ मध्ये काँग्रेसने राष्ट्रवादी काँग्रेसला देऊन टाकला.अन त्यावेळी राज्यात प्रभावशाली नेते अशी ओळख असलेल्या ना.छगन भुजबळ यांचे सुपुत्र पंकज भुजबळ यांना नांदगाव विधानसभेची राष्ट्रवादी काँग्रेसकडून उमेदवारी जाहीर करण्यात आली.

     अवघ्या एकवीस दिवसापूर्वी तालुक्यात आलेल्या पंकज भुजबळ यांना तालुक्याने चक्क आमदार पद बहाल केले.आणि भुजबळ यांना आमदार करण्यात वंजारी समाजाची भूमिका मोठी होती.हे सर्वश्रुत आहे. ते ही भोळ्या-भाबड्या संजय पवार यांना पराभूत करून....त्यानंतर पुलाखालून बरेच पाणी वाहून गेले.तब्बल १५ वर्षे तालुक्यातील जनतेची पदरमोड करून सेवा करत असलेल्या सुहास कांदे यांनाही वंजारी समाजाने भुजबळ यांच्या प्रेमापोटी जवळ केले नव्हते.मात्र दुसऱ्या टर्म वेळी आमदार पंकज भुजबळ घरच्या अडचणी मुळे किंवा अन्य कारणाने तालुक्याचे आमदार असल्याचे विसरून गेले.अन त्यामुळेच 'आमदार दाखवा अन हजार रुपये मिळवा.! असा फलक मनमाड शहरात लागला.आणि त्याचबरोबर भुजबळ यांच्या पी.ए. संस्कृतीने तर पत्रकार ही इतके नाराज झाले की,यावर विशेष बातम्या लिहल्या जाऊ लागल्या होत्या.

        असो...ज्या वंजारी समाजाने भुजबळ साहेब व त्यांच्या पुत्राला परके मानले नाही,त्या भुजबळ साहेबांनी वंजारी समाजाच्या आमदार सुहास कांदे यांना अतिवृष्टी दौऱ्याच्या निमित्ताने सापत्न वागणूक दिल्याचे अवघ्या तालुक्याने बघितले व नोंद घेतली.यात विशेष असे की,आमदार श्री.कांदे यांनी यापूर्वी भुजबळ कुटुंबियांच्या राजकारणासाठी बरीच वर्षे खर्ची घातल्याचा इतिहास आहे.

      असे असतानाही ना.भुजबळ यांनी ज्या संकुचित मनोवृत्तीचे दर्शन तालुक्याला घडवले,त्यावरून 'साहेब' तुम्ही चुकलात असेच उद्गार सर्वांच्या बोलण्यातून व्यक्त होत आहेत.