बिन काट्याचा गुलाब.!

लेखक- भास्करराव कदम माजी नगराध्यक्ष नांदगाव

गुलाब आणि काटे हे एकत्र नांदतात, काटे गुलाबाचे संरक्षण करतात. गुलाब आपल्या उपजत, जातीवंत सुगंधासाठी ओळखले जाते. गुलाबजल, गुलकंद यांची प्रवृत्ती थंड असते. हे सर्व गुलाबाच्या झाडाचे गुणवैशिष्ट्ये. तर प्रमोद उर्फ गुलाब हा आमचा मित्र गुलाबासारखा टवटवीत आहे. त्याच्या सहवासात निर्मळ मैत्रीचा सुगंध सतत दरवळत असतो. गुलाबच्या बोलण्यात कधीही दुसऱ्याच्या मनाला वेदना देणारे बोचरे शब्द नसतात. म्हणून मी त्याला स्वभावानुसार बीन काट्याचा गुलाब असे म्हणत असतो. असा आमचा गोड स्वभावाचा प्रमोद उर्फ गुलाब भाबड याचा आज वाढदिवस. त्याचे मनःपूर्वक अभिष्टचिंतन !

नांदगाव तालुक्यातील वेहेळगाव येथील गुलाब हा मूलनिवासी. वेहेळगाव हे राजकीयदृष्ट्या अत्यंत जागरुक गाव. नांदगाव तालुक्यातील काही गावे ही काही व्यक्तींच्या नावाने ओळखली जातात. स्वातंत्र्यवीर वसंतराव नाईकांचे गाव म्हणून हे गाव संपूर्ण महाराष्ट्रात परिचित. या गावाला समाजसेवेचे बाळकडूच त्यांच्यामुळे मिळाले. आजही या गावाला त्याचा ज्वाजल्य अभिमान आहे. खरेतर स्वातंत्र्यवीर वसंतराव नाईक संपूर्ण तालुक्याचे, जिल्ह्याचे नव्हेतर महाराष्ट्राचे होते. त्यांच्या शौर्याचे पोवाडे आजही गायले जातात. अशा या वेहेळगावचा गुलाब सरपंच आहे. याचा आम्हाला विशेष अभिमान आहे.

गुलाबला तसा राजकीय वारसा आहे. तत्कालीन काँग्रेसचे तालुका अध्यक्ष असलेले जगन्नाथ नाईक यांचा गुलाब हा नातू. नाईकमामा हेही तालुक्यात एक राजकीय प्रस्थ होते. अलीकडच्या काळात नाईक मामांचे वेहेळगाव अशी ओळख झाली होती. गुलाबने मात्र त्याच्या स्वभावाने गावात आपले वेगळी ओळख व स्थान निर्माण केले. शांत, सुस्वभावी गुलाब हा नेहमी गावगाड्याच्या विवादापासून चार हात दूरच राहिला. गावच्या विकासाकडे त्याचे नेहमी लक्ष राहिले. गुलाबाचे व्यक्तिमत्व वेहेळगाव पुरते मर्यादित राहिले नाही. आज तो विद्यमान आमदार सुहासअण्णा कांदे यांचा तो विश्वासू सहकारी झाला आहे. अशाप्रकारे त्याचे आता तालुक्याच्या विकासातही योगदान आहे. त्यामुळे त्याला जिल्हा मजूर फेडरेशनवर संचालक म्हणून प्रतिनिधित्व मिळाले आहे. तालुक्यातून त्याला जिल्ह्यातही कामाची संधी मिळाली आहे. संधी मिळाली तरीही त्याने कधी संधीसाधूपणा केला नाही. त्यामुळे तो सर्वांच्या विश्वासास पात्र ठरला आहे.

गुलाबचे माझे संबंध त्याच्या विध्यार्थीदशेपासूनचे आहे. नाईकमामा हे खरे आमचे राजकीय मार्गदर्शक होते. याची जाणीव गुलाबला आहे. त्याच्या मार्गदर्शकाची भूमिका निभावण्याची संधी मला अनेकदा मिळाली आहे. त्याची त्याला जाणीव आहे. राजकीय भूमिकेपलिकडेही व्यक्तिगत नाते असते, याची जाणीव त्याला पुरेपूर आहे. तो कुणाचेही उपकार कधीही विसरत नाही, हे त्याचे गुणवैशिष्ट्ये आहे. यामुळेच त्याने आपल्यासह भिन्न विचारधारेचे असंख्य मित्र जमविले आहे. त्याचा मित्र परिवार, जनाधार मोठा आहे. अशा अजातशत्रू मित्रास, सहकाऱ्यांस उदंड आयुष्य व उत्तम आरोग्य लाभावे, ह्याच त्याच्या वाढदिवसाच्या निमित्ताने शुभेच्छा !