पालकमंत्री ना.भुजबळ व आमदार कांदे यांची आपत्कालीन निधीवरून शाब्दिक चकमक.!

नांदगाव-: संतोष कांदे

'तुम्ही अध्यक्ष आहात,तर मग माझ्या तालुक्याला आपत्कालीन निधी मंजूर का करत नाही,असा सवाल केल्याने तालुक्याचे आमदार सुहास कांदे व पालकमंत्री ना.छगन भुजबळ यांच्यात चांगलीच शाब्दिक चकमक झाल्याने अतिवृष्टीच्या मुद्द्यावर घेतलेली आढावा बैठक चांगलीच वादळी ठरली.

       जाटपाडे (ता.मालेगाव) व तालुक्यातील साकोरा येथील नुकसानीची पाहणी केल्यानंतर पालकमंत्री ना.भुजबळ यांनी तहसील कार्यालयात आढावा बैठक घेतली.या बैठकीस आमदार सुहास कांदे,माजी आमदार पंकज भुजबळ,सभापती सुभाष कुटे,महिला व बालकल्याण सभापती अश्विनी आहेर,उपविभागीय अधिकारी सोपान कासार,तहसीलदार दिपक पाटील,गटविकास अधिकारी गणेश चौधरी,कृषी अधिकारी जगदीश पाटील,सार्वजनिक बांधकाम अभियंता यशवंत पाटील,मुख्याधिकारी विवेक धांडे,पोलीस उपअधीक्षक समिरसिंह साळवे,पोलीस निरीक्षक अनिल कातकडे,आदी उपस्थित होते.

         राज्याचे अन्न व नागरी पुरवठा मंत्री ना.छगन भुजबळ यांनी आज नांदगाव तालुक्यात अतिवृष्टीने जे नुकसान झाले,त्याची पाहणी करण्यासाठी शासकीय दौरा आयोजित केला होता.जाटपाडे ता.मालेगाव व साकोरा ता.नांदगाव येथे पाहणी केल्यानंतर ना.भुजबळ यांचे नांदगाव शहरात आगमन झाले.शहरातील नुकसानीची पाहणी केल्यानंतर तहसील कार्यालयातील आढावा बैठकीला ते उपस्थित झाले.

     या आढावा बैठकीत तालुक्याचे आमदार सुहास कांदे यांनी तालुक्यात जी आर्थिक हानी झाली आहे,त्यासाठी आपत्कालीन निधी उपलब्ध करून द्यावा अशी मागणी केली.मात्र त्यावर ना.भुजबळ यांनी जिल्हाधिकारी यांच्याशी बोलून निर्णय घेतो असे उत्तर दिले.मात्र आमदार श्री.कांदे यांनी आपण या समितीचे अध्यक्ष असल्याने सर्वाधिकार आपणाकडे आहेत,तरी जिल्हाधिकाऱ्यांना आपण आदेश द्यावेत.अशी आग्रही मागणी केली.त्यावर ना.भुजबळ यांनी त्रोटक उत्तर देत वेळ मारून नेली.तसेच निकष बाजूला ठेवून पंचनामे करावेत अशी मागणी आमदार कांदे यांनी करताच ; ना.भुजबळ यांनी मी सांगितले आहे,होईल असे अस्पष्ट उत्तर देत आमदार कांदे व तालुक्यातील जनतेची बोळवण केली.यामुळे अन्न व नागरी पुरवठा मंत्री तथा जिल्ह्याचे पालकमंत्री ना.छगन भुजबळ यांचा पाहणी दौरा एक फोर्स ठरल्यात जमा झाला आहे.