पालकमंत्री भुजबळ व आमदार कांदे यांच्यात आपत्कालीन निधीवरून शाब्दिक चकमक.!

नांदगाव-: संतोष कांदे

ज्या भुजबळांच्या पुत्राला म्हणजेच पंकज भुजबळ यांना दोन वेळेस आमदार केलेल्या नांदगाव विधानसभा मतदार संघाला आपात्कालीन निधी देण्यास पालकमंत्री ना.छगन भुजबळ यांचा विरोध का.? असा प्रश्न खुद्द ना.भुजबळ यांनी घेतलेल्या आढावा बैठकीत उपस्थित झाल्याने ना.भुजबळ यांनी या बैठकीतून काढता पाय घेतला.

     राज्याचे अन्न व नागरी पुरवठा मंत्री ना.छगन भुजबळ यांनी आज नांदगाव तालुक्यात अतिवृष्टीने जे नुकसान झाले,त्याची पाहणी करण्यासाठी शासकीय दौरा आयोजित केला होता.जाटपाटे ता.मालेगाव व साकोरा ता.नांदगाव येथे पाहणी केल्यानंतर ना.भुजबळ यांचे नांदगाव शहरात आगमन झाले.शहरातील नुकसानीची पाहणी केल्यानंतर तहसील कार्यालयातील आढावा बैठकीला ते उपस्थित झाले.

     या आढावा बैठकीत तालुक्याचे आमदार सुहास कांदे यांनी तालुक्यात जी आर्थिक हानी झाली आहे,त्यासाठी आपत्कालीन निधी उपलब्ध करून द्यावा अशी मागणी केली.मात्र त्यावर ना.भुजबळ यांनी जिल्हाधिकारी यांच्याशी बोलून निर्णय घेतो असे उत्तर दिले.मात्र आमदार श्री.कांदे यांनी आपण या समितीचे अध्यक्ष असल्याने सर्वाधिकार आपणाकडे आहेत,तरी जिल्हाधिकाऱ्यांना आपण आदेश द्यावेत.अशी आग्रही मागणी केली.त्यावर ना.भुजबळ यांनी त्रोटक उत्तर देत वेळ मारून नेली.तसेच निकष बाजूला ठेवून पंचनामे करावेत अशी मागणी आमदार कांदे यांनी करताच ; ना.भुजबळ यांनी मी सांगितले आहे,होईल असे अस्पष्ट उत्तर देत आमदार कांदे व तालुक्यातील जनतेची बोळवण केली.यामुळे अन्न व नागरी पुरवठा मंत्री तथा जिल्ह्याचे पालकमंत्री ना.छगन भुजबळ यांचा पाहणी दौरा एक फोर्स ठरल्यात जमा झाला आहे.