योग्य पोषण आहार हाच कुपोषण मुक्तीचा प्रमुख उपचार.! सभापती अश्विनी आहेर

नांदगाव-: वार्ताहर

योग्य पोषण आहार हाच कुपोषण मुक्तीचा प्रमुख उपचार असल्याचे प्रतिपादन महिला व बालकल्याण समितीच्या सभापती अश्विनी आहेर यांनी केले,त्या तालुक्यातील गणेशनगर (माणिकपुंज) येथील अंगणवाडी केंद्रावर आयोजित राष्ट्रीय पोषण महिना या अभियान अंतर्गत राबवलेल्या कार्यक्रमात बोलत होत्या.

     यावेळी प्रभारी बालविकास प्रकल्पधिकारी श्रीमती गजभिये,मुख्य सेविका श्रीमती नाईक व अंगणवाडी सेविका उपस्थित होत्या.

       पुढे बोलताना सभापती आहेर म्हणाल्या की,अंगणवाडी सेवा लाभार्थ्यापर्यंत प्रभावीपणे पोहचविता याव्यात म्हणून महिला व बालविकास विभागामार्फत प्रत्येक वर्षी सप्टेंबर महिना राष्ट्रीय पोषण महिना म्हणुन देशपातळीवर साजरा करण्यात येतो.

      राष्ट्रीय स्तरावर पोषण अभियानाची सुरुवात २०१८ पासून करण्यात आली आहे.संपूर्ण सप्टेंबर महिना 'पोषणमहा' म्हणून साजरा केला जातो. यामध्ये गरोदर, स्तनदा माता, सहा वर्षापर्यंतची बालके यांच्या आहारात पोषणाचे महत्व वाढवण्यासाठी अंगणवाडी सेविका घरोघरी जाऊन प्रबोधन करतात व विविध कार्यक्रम राबवले जातात.आणि या उपक्रमाअंतर्गत आपल्या जिल्ह्यात ही सर्वत्र याची प्रभावीपणे अंमलबजावणी सुरू आहे.

        यावेळी अंगणवाडी सेविका, मदतनीस,आरोग्य सेविका,आशा सेविका, ग्रामपंचायत पदाधिकारी यांनी रॅली काढुन पोषणाचे महत्व विशद केले.सार्वजनिक ठिकाणी वृक्षारोपन, अंगणवाडी केंद्र परिसरात परसबाग तयार करुन पोष्टीक पालेभाज्यांचे महत्व पटविणे,अंगणवाडी सेविका व मदतनीस यांचे १००% कोवीड लसीकरण, गर्भवती व स्तनदा मातांसाठी कोवीड लसीकरण शिबीरे, आदी उपक्रम राबवले जात आहेत.

     यावेळी अंगणवाडी सेविका सौ.मंगल कांदे,सौ.छाया सोनवणे व अन्य सेविकांनी पौष्टिक पदार्थ,पालेभाज्या असे पदार्थ बनवून ग्रामस्थांना याचे महत्व पटवून दिले.