नांदगाव तालुक्यात पावसाचे थैमान...कोट्यवधी रुपयांचे नुकसान.!

नांदगाव-: संतोष कांदे

   काल रात्रीपासून कधी जोरदार तर कधी संततधार बरसलेल्या पावसाने शहरातील गोरगरीब जनतेचा फाटका संसार वाहून नेला,तर ग्रामीण भागातील शेतकऱ्यांचे हातातोंडाशी आलेले पिक हिरावल्यात जमा झाले आहे.या नुकसानीचा पंचनामा करून नुकसान भरपाई मिळण्याची मागणी या दोन्ही घटकांनी केली आहे.

       शहरातील लेंडी व शाखाबंरी नदीला मोठा पूर आल्याने शहरात पाणी घुसले आहे.या पुरपाण्याने अनेक दुकानांत पाणी घुसून व्यापाऱ्यांचे मोठे नुकसान झाले आहे.डॉ.तुसे यांच्या रुग्णालयात ही पाणी घुसल्याचे दिसून आले.तसेच शहरातील कष्टकरी जनतेचे वास्तव्य असलेल्या अनेक झोपडपट्टीत पुरपाणी घुसून तेल,पीठ,मीठ आदी जीवनावश्यक वस्तूसह संसारपयोगी साहित्य वाहून नेले.तसेच अनेक गरिबांच्या छोट्या टपऱ्या,पाळीव प्राणी ही या पुरात वाहून गेल्याचे अनेक प्रत्यक्षदर्शी नागरिकांनी सांगितले.

     तालुक्याच्या ग्रामीण भागात मन्याड नदीसह अनेक नद्यांना मोठा पूर आला आहे.व अनेकांच्या शेतात पुरपाणी घुसल्याने शेतीपिकांचे अतोनात नुकसान झाल्याचे दिसून आले.

         नायडोंगरी बरोबरच परिसरातील शेती क्षेत्रातील पिकाचे मोठे नुकसान झाल्याने शेतकऱ्यांनी शेताकडे धाव घेतली आहे.शहरात पावसाची विक्रमी नोंद १३३ मी.मी असली तरी तो यापेक्षा जास्त आहे. लहान बंधारे फुटलेत, शेकडो हेक्टर पिकांसह जमीनीचे हानी झाली असून ठिकठिकाणी रस्ते मोरीवरील पुलाचे भराव वाहून गेलेत.नुकसानीचा आकडा निश्चित व्हायला तीन दिवस लागतील.असे कळत आहे.जिल्ह्यातील सर्वाधिक क्षती नांदगाव तालुक्यात झाली असून कोट्यावधींचे नुकसान झाल्याचे वृत्त आहे.