नांदगाव तालुक्यात ओला दुष्काळ जाहीर करा-अश्विनी आहेर

नांदगाव-: वार्ताहर

गेल्या १५ दिवसांपासून सातत्याने बरसत असलेल्या पावसामुळे तालुक्यात ओला दुष्काळसदृश्य परिस्थिती निर्माण झाली असून,येथील शेतकरी मोठ्या आर्थिक संकटात सापडला आहे,त्यामुळे कागदी सोपस्कार बाजूला ठेवून तालुक्यात ओला दुष्काळ जाहीर करावा अशी मागणी अश्विनी आहेर यांनी जिल्हाधिकारी सूरज मांढरे यांच्याकडे केली आहे.

     या निवेदनात पुढे असे म्हटले आहे की, तालुक्यात यंदा सततच्या पर्यन्यवृष्टीमुळे सरासरी पेक्षा दुप्पट पर्जन्यवृष्टी झाल्याने तालुक्यात ओला दुष्काळ निर्माण झालेला आहे.परिणामी तालुक्यातील शेतकरी व शेती व्यवसायाची अपरिमित हानी झालेली आहे. शेतक-यांचा सर्व खर्च व मशागत वाया गेली आहे त्यामुळे तालुक्यातील शेतक-यांवर मोठे अस्मानी संकट कोसळले आहे. शेतकरी व शेती व्यवसायाचा कणाच मोडलेला आहे. या परिस्थतीत शेतक-यांना आर्थिक हातभार लावणे गरजेचे झाले आहे.

    त्यात शेतक-यांचे वीजबील माफ करणे, शेतक-यांचे नुकसानीप्रमाणे सरसकट पंचनामे करून त्यांना नुकसानभरपाई देणे,काही ठिकाणी पंचनामे झाले मात्र सध्यस्थितीत अतिवृष्टी सुरुच असल्याने आवश्यकतेनुसार फेरपंचनामे करण्यात यावेत,शेतक-यांच्या पाल्यांना शालेय महाविदयालयातील शिक्षणात मदतीचा हात देणे,पीक विम्याची रक्कम संबधीत शेतक-यांना विनाविलंब अदा व्हावी,नांदगाव तालुक्यातील शेतकरी कर्जवसुली थांबविण्यात यावी.या मागण्या या निवेदनात केल्या आहेत.यावेळी माजी आमदार अँड.अनिल आहेर उपस्थित होते.