नांदगाव तालुक्यात ओला दुष्काळ जाहीर करावा-: आमदार सुहास कांदे मंत्री ना.वडेट्टीवार यांच्याकडून जिल्हाधिकाऱ्यांना वस्तुनिष्ठ तपासणी करून अहवाल देण्याचा शेरा.

नांदगाव-: वार्ताहर

नांदगाव विधानसभा मतदार संघात ओला दुष्काळ जाहीर करावा.अशी मागणी आमदार सुहास कांदे यांनी मुख्यमंत्री ना.ठाकरे यांच्यासह मदत व पुनर्वसन मंत्री ना.वडेट्टीवार यांच्याकडे एका निवेदनाद्वारे केली आहे.

या निवेदनात असे म्हटले आहे की, मतदारसंघात झालेल्या अतिवृष्टीमुळे शेती पिकांचे अतोनात नुकसान झालेले आहे.त्यामुळे येथील शेतकरी आर्थिकदृष्ट्या कोलमडून पडला आहे,खरीप हंगाम हातातून गेल्याने पुढील रब्बी हंगाम साधण्यासाठी त्याला आर्थिक मदतीची आवश्यकता आहे.  

       मुसळधार पावसामुळे पिकांसोबत जनावरांची गैरसोय होत आहे,शहर,गावांमध्ये  अनेक दिवस पूरपरिस्थिती कायम आहे,अनेकांचा संसार उध्वस्त झाला आहे,सामान्य नागरिकांची परिस्थिती अत्यंत बिकट आहे.अर्थव्यवस्थेचा मुख्य घटक असलेला शेतकरी बांधव पावसापुढे हतबल झाला आहे.अशा परिस्थितीत शेतकरी बांधवांना मदतीची गरज आहे,त्यांना आधार देण्याची गरज आहे.

       महाराष्ट्र शासनाने नांदगाव मतदारसंघात ओला दुष्काळ जाहीर करावा आणि त्वरित शासकीय सोपस्कार पार पाडून शेतकरी व सामान्य जनतेला मदत द्यावी. त्याचबरोबर तीनदा महापूर आल्याने शहरातील अनेक नागरिकांचे व व्यावसायिकांचे ही मोठ्या प्रमाणात नुकसान झाले आहे,त्यांनाही मदत द्यावी अशी विनंती या निवेदनात करण्यात आली आहे.