रेल्वे अपघातात आईची माया हरवलेल्या चिमुरड्याना आमदार कांदे यांच्याकडून भविष्याचा आधार.!

नांदगाव-: वार्ताहर

रेल्वे प्रशासनाच्या चुकीमुळे चार कोवळ्या जीवांना उघडयावर टाकून इहलोकाचा रस्ता धरावा लागलेल्या स्व.सविता शिंदे यांच्या आईविना पोरक्या झालेल्या मुलींना त्यांच्या भविष्याचा विचार करून आमदार सुहास कांदे व सौ.अंजुम कांदे यांनी मोठा आर्थिक आधार दिल्याने ते खऱ्या अर्थाने 'लोक' प्रतिनिधी ठरले आहेत.

     त्याचे असे झाले की,रेल्वे प्रशासनाने रेल्वे गेट बंद करून भुयारी मार्ग काढण्याचा निर्णय घेतला,तेव्हा त्यांनी सविस्तर आराखडा नांदगाव नगरपालिकेला सादर केला.मात्र मूठभर लोकांचे हित जोपासून लाखभर लोकांची हालअपेष्टा होतील,असा निर्णय तत्कालीन नगरपालिका प्रशासन व लोकप्रतिनिधींनी घेतला.अन त्याचे पडसाद आज उमटत आहेत.

     नवरात्र असल्याने शहरातील एकविरा मातेच्या दर्शनासाठी जात असलेल्या सौ.सविता,त्यांच्या मुली व मैत्रिणींना सब-वे मध्ये पाणी असल्याने रेल्वे मार्ग ओलांडून जावे लागले.आणि त्याचवेळी वेगाने आलेल्या गाडीने सौ.शिंदे यांचा बळी घेतला.आणि काही सेकंदात होत्याचे नव्हते झाले.

      चार कोवळ्या जीवांचे क्षत्र हरपल्याने सैरभैर झालेल्या या शिंदे कुटुंबाला खऱ्या अर्थाने मायेचा आधार तालुक्याचे आमदार सुहास कांदे यांच्या मार्गदर्शनाखाली त्यांच्या पत्नी सौ.अंजुम कांदे यांनी दिला.घरात आईचं नसणं हे किती क्लेशदायक असतं हे आपण समजू शकतो.पण नियतीच्या पुढे कुणाचे काही चालत नाही,पण जे आपल्या हातात आहे त्याची जपणूक करणे हे आपल्या हातात आहे,आणि कुटुंबप्रमुख म्हणून ही आपली जबाबदारी आहे.असे समजून आमदार कांदे यांच्या सुविद्य पत्नी सौ.कांदे यांनी या चार मुलींच्या नावावर सुरक्षा ठेव जमा करून ती कागदपत्रे त्याना सुपूर्द केलीत.

         निकिता शिंदे,नंदिनी शिंदे,साक्षी शिंदे,स्वामीनी शिंदे या प्रत्येकीच्या नावे ठेवलेल्या सुरक्षा ठेव ची कागदपत्रे त्यांना सौ.कांदे यांनी यावेळी दिली.व सौ.सविता शिंदे यांचे पती रवींद्र शिंदे यांची आस्थेने विचारपूस करत त्यांना दिलासा दिला. 

         

याप्रसंगी शिवसेना शहरप्रमुख सुनील जाधव,उज्वला खाडे, संगीता बागुल,ललिता राऊत,सरला घोगळे आदींसह पदाधिकारी उपस्थित होते.