जलसंपदा मंत्र्यांनी नांदगावकरांच्या तोंडाला पाने पुसली.!

नांदगाव-: वार्ताहर

राज्याचे जलसंपदामंत्री तथा राष्ट्रवादी काँग्रेसचे प्रदेशाध्यक्ष ना.जयंत पाटील हे आज 'राष्ट्रवादी परिवार संवाद' दौरा निमित्ताने तालुक्यात आले,पुराच्या पाण्याने तालुक्यातील शेती व शहरातील कुटुंबाची दैना झाली असताना ना.पाटील यांनी शासन मदत करेल.! या शब्दावर बोळवण केल्याने नांदगावकरांच्या तोंडाला पाने पुसल्याची चर्चा होत आहे.

      परिवार संवाद यात्रेच्या निमित्ताने राष्ट्रवादी काँग्रेसचे प्रदेशाध्यक्ष तथा राज्याचे जलसंपदा मंत्री ना.जयंत पाटील यांनी आज नांदगाव तालुक्याचा दौरा केला.त्यांचा शहरात प्रवेश होत असतानाच ; शिवसेनेच्या वतीने त्यांचा सत्कार तालुकाप्रमुख किरण देवरे,शहरप्रमुख सुनील जाधव, बाजार समितीचे सभापती तेज कवडे,संतोष गुप्ता,सागर हिरे,विष्णू निकम,सुधीर देशमुख,संजय गिते यांनी केला.

      जलसंपदा मंत्री ना.पाटील यांनी रेल्वे सब-वे ची पाहणी केली.यावेळी त्यांना माजी आमदार पंकज भुजबळ व राष्ट्रवादी काँग्रेसचे शहराध्यक्ष बाळकाका कलंत्री यांनी या सब-वे बाबत माहिती दिली.त्यानंतर त्यांनी फरशी पुलाजवळ जाऊन पाहणी केली.मात्र यावेळी त्यांनी पत्रकारांशी बोलताना राज्य शासन शेतकऱ्यांच्या पाठीशी असल्याचे सूतोवाच केले,मात्र ते ज्या जलसंपदा विभागाचे मंत्री आहेत,आणि महापुरामुळे शहराची वाताहत झाली आहे,त्या बाबत अवाक्षर ही न काढल्याने जलसंपदा मंत्र्यांनी नांदगावकर जनतेच्याया तोंडाला पाने पुसली असल्याचे मत यावेळी व्यक्त होत होते.