सब-वे प्रश्नांवर झालेली बैठक ठोस निर्णय न घेताच आटोपली.!

नांदगाव-: संतोष कांदे  

सामाजिक कार्यकर्ते महावीर जाधव यांच्या वृध्द आईला चादरीच्या झोळीत घालून कंबरे एवढ्या पाण्यातून नदीचा दुसरा किनारा गाठावा लागला. आईचे नशीब बलवत्तर म्हणून या जल संकटातून ती वैद्यकीय मदतीपर्यंत पोहोचू शकली. मात्र अनेकजण तेवढेही नशीबवान नव्हते. या सर्वांच्या हाल अपेष्टांचे मुळ ठरलेल्या सब वे तील त्रुटी दूर करण्यासाठी शहरातील नागरिकामध्ये वाढत्या असंतोषाची दखल घेऊन प्रशासनाची बैठक तहसीलदार डॉ सिद्धार्थ मोरे यांच्या कार्यालयात झाली. 

   

रेल्वे प्रशासन इंद्रायणी नगर बाजूने सब वे ची भिंत बांधण्याच्या मुद्यावर ठाम आहे. नागरिक सब वे मधले पाणी आधी काढा आणि तो वाहतुकीला खुला करा अशी आग्रही मागणी करत आहेत. मटण मार्केटचा अडथळा दूर करून दिला तर रेल्वे सब वे तले पाणी मोठ्या व्यासाच्या पाईप लाईन मधून नदीत फरशी पुलाच्या पुढे सोडून देण्यास तयार आहे. तसे केल्याने सब वे त पाणी साचणार नाही. अशी रेल्वेची भूमिका आहे. मात्र त्यासाठी प्रारूप व निधी आधी मंजूर करून आणावे लागणार आहेत.

 

पर्यायी योजनेत सब वे तले पाणी नदीचे खोलीकरण करून, सब वे समोर नदी पात्रात सोडावे असा मुद्दा आहे. दोन्ही पर्यायांवर चर्चा झाली. परंतु अंतिम निर्णय घेण्यापूर्वी सब वे तले पाणी रेल्वेने आधी काढून द्यावे व नंतर पुढचे प्लान करावेत अशी मागणी नागरिक करत आहेत. रेल्वेचे अधिकारी आधी सब वे भिंत घालून बंद करावा म्हणजे भविष्यात त्या बाजूने पाणी सब वेत येणार नाही. अशा मताचे आहेत.  

सर्व प्रश्न क्लिष्ट व गुंतागुंतीचे असल्याने, रेल्वे आणि नगरपरिषद प्रशासनाने नागरिकांच्या सुविधेला महत्व देऊन अडचणी दूर करण्यासाठी तात्काळ पावले उचलावीत सब वे मुळे निर्माण झालेल्या गैरसोयीनी कायदा व सुव्यवस्थेचा प्रश्न निर्माण होणार नाही याची दक्षता घ्यावी अशा सूचना तहसीलदार डॉ. मोरे यांनी दिल्या.         

 

तब्बल २८ दिवसांपासून पाण्यात बुडालेल्या नांदगावच्या सब वे मुळे पाच हजार लोकसंख्या असलेल्या नागरिकांचे अगणित हाल झाले आहेत. इंद्रायणी नगर, करीम चाल, जय भोले नगर, गांधी नगर या भागांचे शहराशी असलेले दळणवळण अजून हि ठप्प आहे. शाळा सुरु झाल्या असल्या तरी या भागातील एक ते दीड हजार मुलांना शहरात शाळेत येता येत नाही. 

   

बैठकीसाठी रेल्वेचे कार्यकारी अभियंता वाडेकर, शाखा अभियंता रमेश मीना, पोलीस निरीक्षक अनिल कातकडे  व नगर परिषदेचे  मुख्याधिकारी विवेक धांडे, म्ग्र्सेव्क किरण देवरे व नितीन जाधव, राहुल कुटे, बंडू कायस्थ, अभियंता निकम, सार्वजनिक बांधकाम विभागाचे सहाय्यक अभियंता राहुल चोळके व शहरातील विविध संघटनांचे पदाधिकारी व सामाजिक कार्यकर्ते उपस्थित होते.