नांदगावकरांना विकास हवा असेल तर मटण मार्केट पाडावे लागणार.!

नांदगाव-: वार्ताहर

गेल्या महिन्यात शहरात महापुराने जे थैमान घातले होते,अन त्यानंतर जे कवित्व सुरू झाले आहे,ते थांबता-थांबत नसल्याचे दिसून येत आहे.आज मध्य रेल्वेचे अपर रेल मंडल प्रबंधक नयन पाटील यांनी सुमारे एक किलोमीटर इतके अंतर पायी फिरत या सब-वे च्या सर्व अँगल ने  पाहणी केली.व 'तुम्ही सर्वांनी सहकार्य केल्यास ही अडचण कायमस्वरूपी दूर करू.! असे आश्वासन दिले.

     दुपारी एक वाजेच्या दरम्यान श्री.पाटील यांनी रेल्वे स्टेशनपासून पायी दौरा करत या चुकीच्या पद्धतीने बांधलेल्या सब-वे ची चार ही बाजूने पाहणी केली.त्यावेळी त्यांनी मी या नांदगावात तीन वर्षे नोकरी केल्याची आठवण करून देत तुमच्या भावना माझ्यापर्यंत पोहचल्या आहेत.मात्र ज्यावेळी रेल्वे ने हा सब-वे कसा तयार होणार आहे,याचा नकाशा व प्रस्ताव नगरपालिका कडे दाखल केला,तेव्हा नकार मिळाला. तेव्हा या सब-वे ला जिल्हाधिकारी यांच्याकडून परवानगी मिळवावी लागली.आणि आज तीच नगरपालिका जुन्या रेखाचित्र प्रमाणे सब-वे बनवा असे सांगत आहे.मात्र तरीही आम्ही तयार आहोत.असे ते म्हणाले.

     रेल्वे स्थानकावर श्री.पाटील यांनी तहसीलदार सिद्धार्थ मोरे,शिवसेना तालुका प्रमुख किरण देवरे,माजी उपनगराध्यक्ष नितीन जाधव,रिपाई शहराध्यक्ष महावीर जाधव,भाजप शहराध्यक्ष उमेश उगले,नगरपालिकेचे राहुल कुटे,बंडू कायस्थ,स्टेशन प्रबंधक श्री.मीना,व या सब-वे चे निर्माते राहुल अग्रवाल यांच्यासह सर्व पत्रकार उपस्थित होते.

     आमदार सुहास कांदे यांच्या वतीने निवेदन करताना तालुका प्रमुख किरण देवरे म्हणाले की,नगरविकास मंत्री ना.एकनाथ शिंदे यांच्या माध्यमातून सुमारे सात कोटी रुपयांचा निधी या लेंडी नदीच्या खोलीकरण व संरक्षक भिंतीसाठी उपलब्ध झाला आहे.मात्र रेल्वे ने सदर सब-वे मधून मटण मार्केट च्या बाजूने एक रस्ता मालेगाव-मनमाड रस्त्यापर्यंत करून द्यावा.आणि रेल्वे का हे काम करण्यास अडसर ठरणारे मटण मार्केट आम्ही (नगरपालिका) तोडण्यास तयार आहोत.आणि तसे उच्च न्यायालयाचे आदेश ही आहेत.

     भुसावळ विभागाला प्रथमच मराठी भाषिक अधिकारी श्री.पाटील यांच्या रूपाने लाभल्याचा आनंद व्यक्त करत आता नांदगाव शहराची ही समस्या कायमस्वरूपी दूर होईल,असे जेष्ठ पत्रकार संजीव धामणे यांनी म्हटले.

     येत्या आठवडाभरात या प्रश्नावर उच्चस्तरीय बैठक घेऊन कायमस्वरूपी तोडगा काढला जाईल. असे आश्वासन मध्य रेल्वेचे अपर रेल मंडल प्रबंधक नयन पाटील यांनी दिले.