भुजबळ-कांदे वादात मुख्यमंत्री ठाकरे यांनी घातले लक्ष.!

नांदगाव-: वार्ताहर

पालकमंत्री ना.भुजबळ व आमदार श्री.कांदे यांचा ज्या नियोजन विभागाच्या निधीवरून वाद झाला,त्या संबधित कागदपत्रे मुख्यमंत्री ना.उद्धव ठाकरे यांनी मुंबई येथे बोलावून घेतल्याने या प्रकरणातली उत्सुकता वाढली आहे.

       पालकमंत्री ना.छगन भुजबळ हे विकासनिधी वाटपात दुजाभाव करत असल्याचा आरोप करत आमदार सुहास कांदे यांनी थेट उच्च न्यायालयात धाव घेतली आहे.या वादात उपमुख्यमंत्री ना.अजित पवार,खासदार संजय राऊत यांनी ही मध्यस्थी करण्याचा प्रयत्न केला.मात्र मतदार संघाच्या विकासासाठी अंतिम टप्यापर्यंत संघर्ष करण्याची तयारी असल्याचे सूतोवाच आमदार कांदे सातत्याने करत असल्याने हा वाद अद्याप ही शमलेला नाही.

       त्यामुळे मुख्यमंत्री ना.ठाकरे यांनी यात तोडगा काढण्याच्या उद्देशाने जिल्हा नियोजन विभागाच्या अधिकाऱ्यांना सर्व संबधित कागदपत्रे घेऊन मुख्यमंत्र्यांचे शासकीय निवासस्थान असलेल्या वर्षा बंगल्यावर बोलावले असल्याचे खात्रीशीर वृत्त आहे.यात नियोजन निधीचे वाटप,व कामांची माहिती मागवण्यात आली आहे.

       नांदगाव मतदार संघासाठी १२ कोटी रुपयांचा निधी असताना फक्त २ कोटी रुपये देऊन नांदगाव मतदार संघाची बोळवण करण्यात आल्याने आमदार कांदे संतप्त झाले होते.व त्यावरून नांदगाव येथील आढावा बैठकीत मोठी खडाजंगी होऊन हा वाद राज्यभरात चर्चेला आला होता.

     मुख्यमंत्री ना.ठाकरे यांनी आता या प्रकरणात लक्ष घातल्याने या प्रकरणाचे गांभीर्य वाढले असून,यावर काय निर्णय होतो.? याकडे जिल्ह्याचे लक्ष लागले आहे.