माणिकपुंज धरणात बुडून तरुण शेतकऱ्याचा मृत्यू

नांदगाव-: वार्ताहर

आता शेताला पाणी मिळणार या खुशीत असलेल्या तरुण शेतकऱ्याचा वीज पंप सुरू करत असतानाच माणिकपुंज धरणात बुडून मृत्यू झाल्याची दुर्दैवी घटना तालुक्यातील जळगाव बुद्रुक येथे घडली.

    या बाबत अधिक असे की,येथील बाळू विठ्ठल वाघ या तरुण शेतकऱ्याने हंगामी असलेल्या आपल्या शेतीला बागायती बनवण्यासाठी माणिकपुंज धरणावरून उन्हाळ्यात पाईप लाईन केली होती.मात्र आर्थिक अडचण आल्याने पूढील काम अर्धवट राहिले होते.खरीप हंगामातल्या मका पिकामुळे आर्थिक तजवीज झाल्याने पाईप लाईनचे पुढील काम,व वीज पुरवठा आदी बाबी पूर्ण झाल्याने काल (दि.९) रोजी त्यांनी वीज पंप धरणावर बसवण्याचे काम सुरू केले.

    पाण्यात उतरून पोहत जाऊन ते वीज जोडणीचे काम करत असताना दम लागला,आणि तेथेच गटांगळ्या खाऊ लागले.आणि जवळ असलेल्या त्यांच्या मुलाने पोहता येत नसतानाही त्यांना वाचवण्यासाठी पाण्यात उडी घेतली.तेव्हा शेजारी असलेल्या अनेक शेतकऱ्यांनी येथे धाव घेत प्रथम त्यांच्या मुलाला वाचवले,मात्र तो पर्यंत बाळू वाघ यांचा मात्र बुडून मृत्यू झाला.या घटनेने जळगाव बुद्रुक परिसरात हळहळ व्यक्त केली जात आहे.