तर मी राजीनामा देईन.......आ.सुहास कांदे

नांदगाव-: संतोष कांदे

केंद्र व राज्य शासनाकडून निराधार व गोर-गरीब जनतेसाठी जी घरकुल मंजूर होऊन येतात,ती घरकुले बांधण्यासाठी किरकोळ अटींचा बाऊ करून अधिकारी,कर्मचारी पैसे घेतात.आणि हे मी सिद्ध करून दाखवेन..आणि सिद्ध करू शकलो नाही तर मी आमदारकीचा राजीनामा देईन.! असा संताप व्यक्त आमदार सुहास कांदे पंचायत समितीमधील गैरव्यवहाराचे वाभाडे महाआवास अभियान निमित्त बोलावलेल्या कार्यशाळेत काढले.त्यामुळे ही बैठक चांगलीच गाजली.

     प्रधानमंत्री आवास योजना (ग्रा.) महाआवास अभियान २०२१-२२ प्रभावीपणे राबवणे कामी नांदगाव पंचायत समिती कार्यालयात कार्यशाळेचे आयोजन करण्यात आले होते.यावेळी गटविकास अधिकारी गणेश चौधरी यांनी प्रास्ताविक करताना महाआवास अभियान-२ अंतर्गत ४३५० घरकुले मंजूर झाली होती,त्यापैकी ३३०० घरकुले पूर्णत्वास गेली आहेत,तर १०६२ घरकुले  प्रथम रकमेचा हप्ता खात्यावर टाकूनही या कामांना अद्याप ही सुरुवात ही नाही.आणि या बाबत सरपंच,ग्रामसेवक यांची बैठक घेऊन ही घरकुले बांधण्यासंदर्भात मार्गदर्शन करण्यात आल्याची माहिती दिली.त्यानंतर जिल्हा परिषद सदस्य रमेश बोरसे,सभापती सुभाष कुटे यांनी ही गटविकास अधिकारी चौधरी यांच्या वक्तव्याचा धागा पकडून सदर घरकुले बांधण्यासाठी शासनाच्या जाचक अटींचा उहापोह केला.

     त्यानंतर आमदार श्री.कांदे यांनी गटविकास अधिकारी यांना उद्देशून 'या किरकोळ अटींमुळे माझ्या गोरगरीब बांधवांना हक्काच्या घरापासून वंचित राहावे लागत आहे,तर मग तुम्ही ही गोष्ट मला का सांगितली नाही.येथे तुम्ही मला फक्त सत्कारासाठी च बोलावता का.? असा प्रतिप्रश्न केला.तसेच यावेळी काही अधिकारी ,कर्मचारी यांनी ही योजना राबविण्यासाठी चांगले काम केल्याने त्यांचा सत्कार आमदार सुहास कांदे यांच्या हस्ते केला.पण या अधिकारी,कर्मचाऱ्यांचा हा सत्काराचा आनंद औटघटकेचा ठरला.

     ज्यांनी सत्कार स्वीकारला त्या अधिकारी,कर्मचाऱ्यांना उद्देशून आमदार सुहास कांदे यांनी जी घरकुले पूर्ण केलीत,त्या लाभार्थ्यांकडून किती पैसे घेतले.? अशी थेट विचारणा केली.त्यावर नकार आल्याने आमदार श्री.कांदे प्रचंड संतापले.आणि थेट आकडा सांगत हे पैसे तुम्ही घेतले नाही असे सिद्ध झाले तर मी आमदारकीचा राजीनामा देईन.पण पैसे घेतले असे सिद्ध झाले तर तुम्ही राजीनामा देणार का.? असा प्रतिप्रश्न केल्याने उपस्थित सर्वच अवाक झाले.व उपस्थित लाभार्थ्यांना   आवाहन केले की,पैसे दिलेल्यांनी हात वर करावेत,यावेळी काही जण हात वर करण्याच्या बेतात होते,मात्र हे अधिकारी पुढील काम होऊ देणार नाही,यास्तव ते गप्प राहिले.

       २०० रुपये मजुरीने काम करणाऱ्या लाभार्थ्यांकडून पैसे घेताना त्या परमेश्वराचे भान राहू द्या.! यापुढे चांगले काम करा,नाहीतर येथील पैसे घेणारे अधिकारी,कर्मचारी मी स्वतः अँटी करप्शन कडे पकडून देईन.असा सज्जड दम ही आमदार श्री.कांदे यावेळी दिला.

    या कार्यशाळेस आमदार सुहास कांदे,सभापती सुभाष कुटे,जिल्हा परिषद सदस्य रमेश बोरसे,सदस्य भाऊसाहेब हिरे,तहसीलदार सिद्धार्थ मोरे,गटविकास अधिकारी गणेश चौधरी,संजय आहेर,किशोर लहाने,आदींसह पंचायत समिती,तहसील मधील अधिकारी,कर्मचारी, सरपंच,ग्रामसेवक मोठ्या संख्येने उपस्थित होते.सूत्रसंचालन गटशिक्षणाधिकारी प्रमोद चिंचोले यांनी केले.