कांदे लावायला आल्या नाहीत तर मी जीव देईन...... मजूर टंचाईमुळे शेतकरी झालेत हतबल...

नांदगाव-: संतोष कांदे

  कांदा लागवडीची जय्यत तयारी झाली असताना मजूर महिलांनी अचानक घुमजाव केल्याने संबधित शेतकऱ्याने थेट विष पिण्याची धमकी दिल्याने,त्यांची लागवड पूर्ण करण्यात आली.मात्र मजूर टंचाईचे दाहक वास्तव या निमित्ताने समोर आले आहे.

    तालुक्यात कांदा लागवड मोठ्या जोरात सुरू आहे.गेल्या पाच वर्षांपासून कांदा भावात सातत्य टिकून राहिल्याने कांदे लागवडीकडेच सर्व शेतकऱ्यांचा कल आहे.त्यातच पाऊस मोठ्या प्रमाणात बरसल्याने यंदा कांदा लागवडीचे प्रमाण लक्षणीय आहे.आणि यामुळेच मजूर टंचाई  सद्यस्थितीत काळजीचा विषय बनला आहे.

      तालुक्यातील एका गावात एका प्रगतिशील शेतकऱ्याने मजूर महिलांची १० हजार रुपये एकर याप्रमाणे मजूर महिलांची एक टोळी ठरवली.आज कांदे लागवड होणार म्हणून त्या घरातील सर्व कुटुंब सदस्यांनी पहाटे चार वाजेपासून रोप उपटून ठेवले.लागवडीची सर्व जय्यत तयारी करून ठेवली.मात्र वेळ उलटून गेली तरी मजूर महिलांची टोळी का आली नाही.? म्हणून तपास केला तर त्या महिला दुसऱ्याच शेतकऱ्याच्या शेतात कांदे लागवड करत असल्याचे दिसून आले.व त्यांनी काही कारणास्तव येण्यास नकार दिला.

      हजारो रुपयांचे रोप उपटून ठेवलेले...आणि मजूर येत नाही...म्हणून सदर शेतकरी हतबल झाला,डोळ्यासमोर नुकसानीचा आकडा फेर धरून नाचू लागला.तेव्हा मनात काही विचार करून सदर शेतकरी तेथून निघून आला,मात्र काही मिनिटात हातात विषारी कीटकनाशक ची बाटली घेऊन तेथे आला.

      या महिलांना उद्देशून जर तुम्ही आता माझ्या शेतात कांदा लागवड केली नाही तर,मी येथेच हे औषध पिऊन आत्महत्या करेन असा दम भरला,व तशी कृती ही सुरू केल्याने या मजूर महिलांनी मग प्रसंगावधान राखून या शेतकऱ्याच्या शेतात धाव घेऊन त्यांची कांदे लागवड करून दिली.अन पुढचा कटू प्रसंग टळला.