श्रीमती बनसोड यांच्याकडून नांदगाव बालविकास प्रकल्पातील मुख्य सेविकांची कानउघाडणी.!

नांदगाव-: वार्ताहर

तालुक्यातील कुपोषण कमी करण्यासाठी व गरोदर मातांची योग्य काळजी घेतली नसल्याचा पुनरुच्चार करत जिल्हा परिषदच्या मुख्य कार्यकारी अधिकारी लीना बनसोड यांनी नांदगाव प्रकल्पातील मुख्य सेविकांना धारेवर धरत चांगलीच खरडपट्टी काढली.तसेच जलजीवन विभागाच्या उपअभियंत्यानाही चांगलेच सुनावत कामकाज सुधारण्याची सक्त ताकीद देण्यास त्या विसरल्या नाहीत.

      श्रीमती बनसोड यांनी तालुक्यात राबविण्यात येत असलेल्या विविध योजनांची अंमलबजावणी संदर्भात आढावा पंचायत समितीच्या सभागृहात बैठक घेतली.त्यावेळी तालुक्यातील महिला व बालविकास विभागाच्या मुख्य सेविकांच्या कामकाजाबाबत कडक ताशेरे ओढले.व कामकाज सुधारण्याबाबत सक्त ताकीद दिली.

       यावेळी श्रीमती बनसोड यांनी शिक्षण विभाग,स्वच्छ भारत अभियान,सांडपाणी घनकचरा व्यवस्थापन,प्रधानमंत्री आवास योजना,माझी वसुंधरा योजना,महाराष्ट्र ग्रामीण रोजगार हमी योजना,इमारत व दळणवळण विभाग,लघु पाटबंधारे विभाग,उमेद योजना,कृषी विभाग,पशु संवर्धन विभाग,असा चौफेर आढावा घेतला.

     पंचायत राज समितीने गटविकास अधिकारी गणेश चौधरी यांचे ड्रेस कोड संकल्पना यशस्वीपणे राबवली म्हणून कौतुक केले होते,ती आठवण ठेवून श्रीमती बनसोड यांनी ही श्री.चौधरी यांचे विशेष कौतुक यावेळी केले.तसेच शिक्षण विभागाने राबवलेल्या झाड लेकीचं...आठवणीच...या कवितेचे व अधिकारी ,कर्मचाऱ्यांनी राबवलेल्या शालोपयोगी मोफत साहित्य व दप्तर योजनेचे ही त्यांनी कौतुक केले.यावेळी सर्व अधिकारी कर्मचारी उपस्थित होते.