अंगणवाडीतील अनुसूचित जातीच्या मुलांना सभापती अश्विनी आहेर यांचे हस्ते मोफत गणवेश वाटप

नांदगाव-: वार्ताहर

अंगणवाडीत शिकणाऱ्या अनुसूचित जातीच्या बालकांना मोफत गणवेश देण्याची योजना शासनाने सुरू केली आहे,त्या अंतर्गत तालुक्यातील न्यायडोंगरी येथील अंगणवाडीत गणवेश वितरण करून जिल्हा परिषदेच्या महिला व बालकल्याण समितीच्या सभापती अश्विनी आहेर यांच्या हस्ते शुभारंभ करण्यात आला.

        नाशिक जिल्हा परिषदेच्या महिला व बालविकास समितीमार्फत सन २०२१-२२ या आर्थिक वर्षात विशेष घटक योजनांतर्गत अनुसूचित जाती प्रवर्गातील अंगणवाडीतील ४ ते ६ वयोगटातील बालकांना (मुली मुलांना मोफत गणेवश देणेबाबत योजना राबवली जात आहे.यावेळी माहिती देताना सभापती आहेर म्हणाल्या की, अंगणवाडीतील बालकांना मोफत गणेवश वाटप करणे ही अतिशय स्तुत्य व आजच्या काळात अत्यंत गरजेची बाब होती.जेणेकरून या बालकांना गणवेशामुळे नीटनेटकेपणा व स्वच्छता याची सुध्दा शिस्त लागेल,व पालकांना सुध्दा गणवेश खर्चाचा भार सहन करावा लागणार नाही.

        दरम्यान सदर योजना राबविण्यासाठी जिल्हा परिषदेच्या मुख्य कार्यकारी अधिकारी श्रीमती लिना बनसोड व महिला बालविकास अधिकारी दिपक चाटे यांनी सुध्दा तातडीने कार्यवाही करुन तात्काळ गणवेश उपलब्ध करुन दिले आहे.जिल्हयात निधीच्या प्रमाणात खालील प्रमाणे गणवेश वाटप करण्यात येत आहेत.

सिन्नर (७४५) ,निफाड (१६९२) , येवला (७५६) , चांदवड (६२६) , नांदगांव (३६९), मालेगांव (१५२२) , 

बागलाण (५४०)  एकूण ६२५० याप्रमाणे गणवेश उपलब्ध करून देण्यात आले आहेत.