तालुक्यातील जनतेच्या आरोग्य रक्षणासाठी शिवसेना प्रशासनाबरोबर सज्ज -आमदार सुहास कांदे

नांदगाव-: संतोष कांदे

माझ्या मतदार संघातील जनतेच्या आरोग्य रक्षणासाठी माझ्यासह माझे शिवसैनिक प्रशासनाच्या खांद्याला खांदा लावून काम करतील,असे स्पष्ट करून प्रशासनाने ही अत्यंत सजग राहून कामकाज करावे अशी सक्त सूचना आमदार सुहास कांदे यांनी केली.

     तालुक्यात कोरोनाचा प्रादुर्भाव वाढू लागला आहे.त्याची गंभीर दखल घेऊन आमदार श्री.कांदे यांनी आरोग्य, महसूल,नगरपालिका,कृषी,पोलीस,आणि शिक्षण विभागाची तातडीची बैठक शासकीय विश्रामगृह शिवनेरी च्या सभागृहात बोलावली होती.

    या बैठकीत नांदगाव मनमाड शहरातील   ऑक्सिजन बेडची उपलब्धता,संपूर्ण तालुक्यात लसीकरणावर भर देण्यासाठी प्रयत्न करणे,प्रथम द्वितीय डोस पूर्ण करण्यावर भर देणे,पंधरा वर्ष पुढील तरुणांच्या १००% लसीकरण करून घेण्यावर भर देणे, प्रत्येक जास्तीत जास्त नागरिकांचे लसीकरण करण्यासाठी सोशल मीडिया मनुष्यबळ प्रकारे जनजागृती करणे साठीच्या सूचना आमदारांनी केल्या.

       आमदार श्री.कांदे म्हणाले की, लसीकरणासाठी आपण गावोगावी कॅम्प लावा.लोकांना बाहेर काढण्याची जबाबदारी घ्यायला माझा पक्ष आणि मी तयार आहे,

प्रत्येक गावातील आमचे शिवसैनिक पदाधिकारी आपणास सहकार्य करतील.तसेच आपणास पाहिजे तो स्टाफ मदतीसाठी मी उपलब्ध करून देण्यास तयार आहे.

     या बैठकीस तहसीलदार सिद्धार्थ मोरे

नांदगाव नगरपालिकेचे मुख्याधिकारी विवेक धांडे,मनमाडचे श्री.मुंढे,पोलीस निरीक्षक रामेश्वर गाडे,गट विकास अधिकारी गणेश चौधरी,तालुका वैद्यकीय अधिकारी डॉ.संतोष जगताप,मनमाड उपजिल्हा रुग्णालयाचे डॉ. नरवणे,गटशिक्षणाधिकारी प्रमोद चिंचोले,तालुका कृषी अधिकारी जगदीश पाटील,तालुका प्रमुख किरण देवरे,गुलाब भाबड, सागर हिरे,अय्याज शेख,सुनील जाधव आदी उपस्थित होते.