चांदवड-जळगाव महामार्गावर झालेल्या अपघातात चिंचविहीर येथील लष्करी जवानाचा दुर्दवी मृत्यू.!

नांदगाव-: प्रतिनिधी

   चिंचविहीर येथून नांदगावला चाललेल्या संरक्षण दलातील दोघा जवानांचा चांदवड-जळगाव या राष्ट्रीय महामार्गावरील जळगाव खुर्द परिसरातल्या विराज लान्स जवळच्या धोकादायक वळणावर अपघात होऊन त्यात एकजण जागीच ठार झाला तर दुसरा गंभीर जखमी झाल्याची दुर्दवी घटना काल सायंकाळी घडली.या घटनेने पंचक्रोशीत शोककळा पसरली आहे.

     याबाबत अधिक असे की,घाटमाथ्यावरील बोलठाण येथील संरक्षण दलातील अमोल पाटील यांच्या अंत्यविधीसाठी संरक्षण दलात कार्यरत असलेले गोपाळ दादा दानेकर (वय-३१) व नयनेश बापू घाडगे (वय-३४) (चिंचविहीर ता.नांदगाव)  हे दोघे गेले होते.अंत्यविधी आटपून घरी आल्यानंतर ते सायंकाळी नांदगावला जात असताना विराज लान्स जवळच्या धोकादायक वळणावर  समोरून  आलेल्या अँपेरिक्षाची व त्यांच्या बुलेटची जोरदार धडक झाली.त्यात गोपाळ जागीच ठार झाला तर नयनेश गंभीर जखमी झाल्याने त्याला मालेगाव येथे हलवण्यात आले आहे.

     अवघ्या पाच दिवसात तालुक्यात दोन लष्करी जवानांचा अपघाती मृत्यू झाल्याने हळहळ व्यक्त केली जात आहे.