बोलठाण च्या जवानाला वीरमरण ऐन संक्रांतीच्या दिवशी शोककळा

नांदगाव-: संतोष कांदे

 संक्रातीचा गोडवा संपण्याच्या आतच तालुक्यातील बोलठाण येथील जवान अमोल हिमतराव पाटील यांना नेपाळच्या सीमेवर विजेच्या धक्क्याने वीरमरण आल्याने येथील सर्व वातावरण कडवट झाले आहे.सर्वत्र हळहळ व्यक्त होत आहे.

            या बाबत अधिक असे की,येथील अमोल पाटील सशस्त्र सीमा बळाच्या नेपाळ येथील विरपूर सीमेवर कार्यरत होता.त्यांच्या कॅम्पमध्ये वीज दुरुस्तीचे काम करत असताना ११ के.व्ही. च्या विजेचा धक्का त्याला बसला.त्याचबरोबर काम करत असलेले अन्य दोन जवानांचा ही यावेळी मृत्यू झाले असल्याचे वृत्त आहे.

             दरम्यान ऐन तारुण्यात झालेल्या अपघातात जखमी झालेला असतानाही   जिद्द आणि चिकाटीमुळे अमोल गेल्या सहा वर्षांपूर्वी सशस्त्र सीमा बलात भरती झाला होता.गेल्या अडीच महिन्यांपूर्वी तो दिवाळीच्या सुट्टीवर तो घरी आला होता.व त्यावेळी आई,पत्नी व नऊ महिन्यांच्या मुलीला सोबत घेऊन गेला होता.

            वडिलांचे छत्र हरपलेल्या जवान अमोलच्या पश्चात पत्नी, सहा महिन्यांची मुलगी, आई, अविवाहित भाऊ असा परिवार आहे. जवान अमोलचे पार्थिव बोलठाण येथे आणण्यात येणार असून केंद्र व राज्य सरकार यांच्या कोविड नियमांचे आधीन राहून त्याच्यावर शासकीय इतमामात अंत्यसंस्कार करण्यात येणार असल्याची माहिती नांदगावचे तहसीलदार सिद्धार्थ मोरे  यांनी दिली.