भारतमातेचा सुपुत्र अमोल अनंतात विलीन..

 नांदगाव-: संतोष कांदे

 

ऐन मकरसंक्रांत सणाच्या दिवशी देशाच्या इंडो - नेपाळ सीमेजवळील वीरपूर येथे कार्यरत असताना झालेल्या वीज अपघातात अमोल पाटील शहीद झाले होते.सदर बातमी मिळताच नांदगाव तालुक्यातील बोलठाण परिसरात शोककळा पसरली.शहीद जवान अमोल पाटील यांचे पार्थिव सकाळी दहा वाजता औरंगाबाद वरुन त्यांच्या मूळ गावी बोलठाण येथे पोहचले.नागरिकांनी रस्त्याच्या दुतर्फेला स्वच्छता करुन, सडा-रांगोळी काढून ठिकठिकाणी आदरांजलीचे बॅनर लावून भावना व्यक्त केली. शहीद जवान अमोल पाटील यांच्या घरी त्यांचे पार्थिव काही वेळ अंतिम दर्शनासाठी ठेवण्यात आले. शहिद पाटील यांची नऊ महिन्यांची चिमुकली कन्या अदिती,पत्नी,आई व लहान भाऊ तसेच त्यांच्या कुटूंबातील नातलगांनी त्यांचे अंत्यदर्शन घेतले, यावेळी कुटूंबांतील सदस्यांनी एकच आक्रोश केला. कुटूंबियांच्या आक्रोशाने उपस्थितांचे डोळे पाणावले. त्यानंतर  सजवलेल्या वाहनामधून बोलठाण गावी देशभक्तीपर गीतांत अंत्ययात्रा काढण्यात आली. यावेळी अंत्ययात्रेमध्ये आजी - माजी सैनिक,एनसीसी चे विद्यार्थी, तरुणांसह असंख्य नागरीक सहभागी झाले होते.बोलठाण परिसरात अभूतपूर्व शोकाकूल जनसमुदायाचे प्रत्यक्ष दर्शन घडवून आले होते.सशस्त्र सीमा बलाचे अधिकारी,विविध पोलिस अधिकारी,माजी सैनिक संघटना आदींनी पुष्पचक्र अर्पण करुन श्रध्दांजली दिली.विविध राजकीय, सामाजिक क्षेत्रातील व्यक्तींनी आपली भावना व्यक्त करुन शहिदांस आदरांजली अर्पण केली .

  शहीद जवान पाटील यांचे लहान भाऊ रोशन पाटील याने पार्थिवाला मुखाग्नी दिला. यावेळी अमर रहे...अमर रहे वीर जवान अमोल पाटील अमर रहे,भारत माता की जय...अशा घोषणांनी परिसर दणाणून गेला होता.भारतीय सशस्त्र सीमा बल व महाराष्ट्र पोलिस यांच्याकडून बंदुकीच्या फैरी झाडून मानवंदना देण्यात आली व शासकीय इतमामात महाराष्ट्राचे सुपुत्र शहीद जवान अमोल पाटील यांच्या पार्थिवावर त्यांच्या बोलठाण या गावी दुपारी दोन वाजता शोकाकुल वातावरणात अंत्यसंस्कार करण्यात आले. यावेळी शहीद जवान अमोल पाटील यांना अखेरचा निरोप देण्यासाठी पंचक्रोशीतून हजारो ग्रामस्थांची उपस्थिती होती.शहिदाच्या अंत्यसंस्कारासाठी  शोकाकुल वातावरणात साश्रू नयनांनी परिसर अक्षरशः न्हावून निघाला होता.

    नांदगावचे आमदार सूहास आण्णा कांदे,वैजापूरचे आमदार रमेश बोरनारे, माजी आमदार अनिल आहेर, माजी आमदार संजय पवार,नायब तहसीलदार मरकड, प्रहारचे संदीप सूर्यवंशी.मा.जि.प.सदस्य राजेंद्र पवार आदींनी शहिद पाटील यांच्या पार्थिवावर पुष्पचक्र अर्पण करुन श्रद्धांजली अर्पण केली.शहीद जवानाला अखेरचा सलाम करण्यासाठी असंख्य विद्यार्थी व तरुणांनी हाती तिरंगी ध्वज घेवून आदरांजली वाहिली.आमदार सुहास कांदे यांनी पाटील कुटुंबियांना पाच लाखांची मदत व शासकीय योजनांचा लाभ मिळवून देणार व बोलठाण तेथे शहीद स्मारकासाठी मदत करणार असल्याचे आश्वासन उपस्थितांना दिले.तालूका परिसरात शहिद जवान अमोल  पाटील यांच्या बलिदानाने विविध स्तरांतून शोक व्यक्त केला जात आहे.