कागदपत्रांमध्ये फेरफार करून शासकीय जमीन हडप करण्याचा प्रयत्न करणाऱ्या विरोधात गुन्हा दाखल ; आरोपीस चार दिवसाची पोलीस कोठडी

नांदगाव-: संतोष कांदे

तालुक्यातील गंगाधरी येथील गट क्रमांक-५ (नवीन व जुना सर्व्हे नंबर-५५३ /अ१/) (क्षेत्र १५० फूट लांब व १०० फूट रुंद) या शासकीय जमिनीच्या दस्तवेजामध्ये तसेच वेळोवेळी पारित केलेल्या शासकीय आदेशामध्ये फेरफार करून शासनाची फसवणूक करणाऱ्या सुखदेव खैरनार यांच्या विरोधात तहसीलदारांनी नांदगाव पोलीसात गुन्हा दाखल झाल्याने तालुक्यात खळबळ उडाली आहे.

       या बाबत अधिक असे की,बाणगांव बुद्रुक येथील प्रकाश लोढा यांना दि.३१/१/१९८५ रोजी मालेगाव येथील उपविभागीय अधिकाऱ्यांनी सदर क्षेत्र दुग्ध व्यवसायासाठी देण्याचे आदेश पारित केले होते.व त्या बदल्यात जो मोबदला शासनास जमा करणे आवश्यक होते,तो मोबदला ही त्यांनी दि.५/३/१९८५ रोजी भरणा ही केला होता.ही या जमिनीची सत्य स्थिती असताना मल्हारवाडी येथील सुखदेव खैरनार या सर्व दस्तावेजामध्ये बेकायदेशीर फेरफार करून लोढा यांच्या मूळ पावत्या,दस्तावेज मध्ये खाडाखोड करून सदर मागणी अर्ज,उपविभागीय अधिकारी यांचे मूळ आदेश,पैसे भरल्याच्या पावत्या अशा सर्वच शासकीय दस्तावेज मध्ये बेमालूम फेरफार केली.व सदर जमीन हडपण्याचा प्रयत्न केला म्हणून तहसीलदार सिद्धार्थ मोरे यांच्या आदेशानुसार बंदी अव्वल कारकून भिका नरोटे यांनी सुखदेव खैरनार यांच्या विरोधात गुन्हा दाखल केला.

      गुन्हा दाखल होताच पोलिसांनी आरोपी खैरनार यास अटक करून न्यायालयासमोर हजर केले असता त्यांना चार दिवसाची पोलीस कोठडी सुनावण्यात आली आहे.