कृषिमंत्र्यांचे लक्ष वेधण्यासाठी त्यांची ५० किलोमीटरची पायपीट....

नांदगाव-: संतोष कांदे

सन २०१९ या आर्थिक वर्षात तालुक्यात जी अतिवृष्टी झाली,तीत जळगाव खुर्द येथील ही शेकडो एकर क्षेत्रातील पिके प्रभावित झाली.शासनाकडून नुकसान भरपाई जाहीर होऊन वाटप ही झाले,मात्र या गावाला अद्याप नुकसान भरपाई मिळाली नसल्याने काही तरुण शेतकऱ्यांनी पायी प्रवास करत राज्याच्या कृषिमंत्र्यांना गाठले...व दाद मागितली.

     या बाबत अधिक असे की,२०१९ मध्ये जी अतिवृष्टी झाली होती,त्यात इतर गावांप्रमाणेच जळगाव खुर्द गावातील शेतीचे ही मोठे नुकसान झाले होते.इतर गावांना नुकसान भरपाई मिळाली,मात्र जळगाव खुर्द गाव मात्र तांत्रिक अडचण किंवा अन्य कारणाने अजूनही वंचित आहे.आणि या गोष्टीची वारंवार तक्रार करूनही कुठलीच हालचाल प्रशासकीय पातळीवर दिसून येत नसल्याने या गावातील रावसाहेब सरोदे,अमोल सरोदे,ज्ञानेश्वर रंधे,शुभम मोकळ,भैय्यासाहेब वाघ, आनंदा सरोदे, महेश टिळेकर, भूषण रंधे या तरुण शेतकऱ्यांनी जळगाव खुर्द ते मालेगाव पायी प्रवास करत रात्री उशिरा राज्याचे कृषिमंत्री ना.दादा भुसे यांची भेट घेऊन कैफियत मांडली.

        त्यावर कृषिमंत्री ना.भुसे यांनी सहानुभूतीपूर्वक या तरुण शेतकऱ्यांची विचारपूस करत हा प्रश्न मार्गी लावण्याचे आश्वासन दिले.