किलोवर घेतले जाणारे धान्य ग्राममध्ये घेण्याची वेळ....

सा.शनैश्वर टाइम्स वृत्तसेवा

नांदगाव-: संतोष कांदे

अधिक नफा कमावण्याच्या नादात अन्नधान्य पिकं पेरणीकडे दुर्लक्ष करून शेतकऱ्यांनी नगदी पिकांकडे अधिक लक्ष पुरवल्याने कडधान्य भाव गगनाला भिडले आहेत,त्यामुळे 'किलो' च्या मापात घ्यावे लागणारे हे धान्य 'ग्राम' मध्ये घेण्याची वेळ सर्वसामान्य जनतेवर आली आहे.

      जुन्या काळात उत्तम शेती,मध्यम धंदा,कनिष्ठ नोकरी असे जे समीकरण पूर्वजांनी तयार करून ठेवले होते.त्याला नंतरच्या काळात शेती उत्पादनात आलेली घट,शेतमालाचे सतत पडणारे भाव,आणि सर्वात महत्वाचे निसर्गाचा लहरीपणा यामुळे शेतकरी मेटाकुटीस आला अन मग "उत्तम नोकरी मध्यम धंदा आणि कनिष्ठ शेती" असा बदल शेती क्षेत्रात सतत येणाऱ्या नुकसानीला कंटाळून आपसूकच होत गेला.आणि यामुळे बँका,खाजगी सावकार यात भरडून आत्महत्या सुरू झाल्यात.

     बेभरवशाची झालेली शेती विकून नोकऱ्या मिळवणे सुरू झाले.मात्र आजपासून २०/२२ वर्षे मागे गेले तर शेतीत नवनवीन बदल होत गेले.कडधान्य,अन्न धान्य पिकांतून परवडत नाही,म्हणून ही पिके घरापूरतीच घ्यायची असे ठरवून रासायनिक खतांचा भरमसाठ वापर करून कांदा, मका,कपाशी,या नगदी पिकांकडे सर्वच शेतकऱ्यांनी आपले लक्ष केंद्रित केले.आणि यात विशेष असे की,यात सर्वांनाच चांगले उत्पन्न मिळू लागल्याने आर्थिक प्रगती मोठ्या प्रमाणात साधली गेली असल्याचे दिसून येत आहे.

        जास्त उत्पन्न मिळवण्याच्या नादात रासायनिक खतांचा अमर्यादित वापर वाढल्याने जमिनीचा पोत दिवसेंदिवस खालावत चालला आहे.भावी पिढीसाठी भविष्यात या शेतीतून काही उगवेल की नाही.? याची शाश्वती राहिलेली नाही.पण असो...अन्नधान्य पिकातील गहू,बाजरी,ज्वारी तर कडधान्य पिकातील मठ,मूग,तूर,कुळीथ,हरभरा,तेलबिया पिकातील सोयाबीन,भुईमूग,सूर्यफूल,तीळ या पिकांचे उत्पादन घरापूरतेच होऊ लागल्याने भाव गगनाला भिडले आहेत.

       नांदगाव कृषी उत्पन्न बाजार समितीत शनिवारी हाताच्या बोटावर मोजण्याइतकी आवक आली होती.तीत बाजरी-२ हजार ४३० रुपये प्रति क्विंटल (आवक फक्त-८ क्विं.),गहू-१ हजार ९५० (आवक-५९ पोते),ज्वारी-१ हजार ७०० (आवक-१ पोते),मूग-५ हजार रुपये (आवक-१ पोते),मठ-१२ हजार रुपये (आवक-१ पोते),हरभरा-४ हजार रुपये (आवक-५ पोते),तूर-५ हजार ९५० रुपये (आवक-५ पोते) अशी अवस्था आहे,आणि जवळपास अशीच परिस्थिती तेलबिया पिकांची आहे.