मनमाड नगरपालिकेने प्रोत्साहन भत्ता द्यावा.! आशा संघटनेचे आमदार सुहास कांदे यांच्याकडे साकडे..

 सा. शनैश्वर टाइम्स वृत्तसेवा

  नांदगाव-: संतोष कांदे

कोरोना काळात शासनाच्या अधिकारी,कर्मचाऱ्यांच्या खांद्याला खांदा लावून काम केलेल्या आशा स्वयंसेविकांना त्या-त्या स्थानिक स्वराज्य संस्थेच्या माध्यमातून प्रति महिना एक हजार रुपये प्रोत्साहन कबूल केला गेला,मात्र मनमाड नगरपालिकेकडून शासन आदेशाची अमंलबजावणी होत नसल्याने आशा संघटनेने आमदार सुहास कांदे यांची भेट घेऊन कैफियत मांडली.त्यावर आमदारांनी मुख्याधिकाऱ्यांना सदर प्रोत्साहन भत्ता देण्याचे निर्देश तत्काळ दिलेत.

 

        आशा स्वयंसेविका व गटप्रवर्तक यांना कोरोना प्रोत्साहन भत्ता देण्यासंदर्भात महाविकास आघाडी सरकारने मार्च २०२० आदेश काढला मात्र मनमाड नगरपालिकेने आजपर्यंत या आदेशाची अमंलबजावणी केलेली नाही.शहरातील आशा स्वयंसेविका व आशा सुपरवायझर गटप्रवर्तक यांना कोरोना प्रोत्साहन भत्ता एप्रिल २०२० ते जानेवारी २०२२ पर्यंत थकीत रक्कम २१०००/- रुपये प्रत्येकी बाकी आहे.आणि हा प्रोत्साहन भत्ता कोरोना संसर्ग संपेपर्यंत आहे.त्यामुळे ही तत्काळ द्यावी असे निर्देश आमदार कांदे यांनी यावेळी दिलेत.

        आमदार सुहास कांदे यांच्या निर्देशानंतर नगरपालिकेने यात हयगय केली तर बेमुदत उपोषणाचा मार्ग अवलंबण्यात येईल असा इशारा जिल्हा संघटक कॉ.विजय दराडे यांनी दिला आहे.यावेळी जिल्हा उपाध्यक्ष दिपाली कदम, मनमाड शहर अध्यक्ष मोहिनी मैंद, वैशाली जगताप, सुनिता सातदिवे यासह आशा स्वयंसेविका  उपस्थित होत्या.