वेहेळगावला दोन अतिरिक्त फीडरचे आमदार कांदे यांचे हस्ते उदघाटन.!

नांदगाव-: संतोष कांदे

तालुक्यातील वेहेळगाव येथील वीज वितरण कंपनीच्या ३३/११ केव्ही विद्युत उपकेंद्रात दोन नव्या अतिरिक्त फिडरचे उदघाटन आमदार सुहास कांदे यांचे हस्ते आज करण्यात आले.

         या उपकेंद्रातून सतत कमी दाबाच्या वीज पुरवठ्याने घरगुती वापर करणारे ग्रामस्थ व शेतकऱ्यांना मोठ्या त्रासाला दररोज सामोरे जावे लागत होते.त्यामुळे या ग्रामस्थांनी हा प्रश्न आमदार कांदे यांच्या कानावर घातला होता.आमदार कांदे यांनीही हा प्रश्न महत्वाचा मानून वीज वितरण कंपनीच्या वरिष्ठ अधिकाऱ्यांशी चर्चा करून सदर प्रश्न जलद गतीने सोडवण्याच्या सूचना केल्या होत्या.त्याची पूर्तता झाल्याने आज आमदार कांदे यांचे हस्ते नारळ वाढवून या अतिरिक्त फिडरचा शुभारंभ करण्यात आला.

         नव्याने बसविण्यात आलेल्या फिडर मुळे वीज पुरवठा उच्च दाबाने मिळणार असून याचा फायदा वेहेळगाव, कळमदरी, आमोदे, बोराळे, जामदरी, तळवाडे या गावातील शेतकरी व नागरिकांना होणार असल्याने उपस्थित पंचक्रोशीतील शेतकऱ्यांनी आमदार सुहास कांदे यांचे आभार मानले. याप्रसंगी शिवसेना तालुकाप्रमुख किरण देवरे, वीज वितरण कंपनीचे उपअभियंता श्री. वाटपाडे व सहाय्यक अभियंता श्री. सोनटक्के आदी उपस्थित होते.