विद्यार्थ्यांनी परीक्षेला जाताना भयमुक्त व तणावमुक्त असावे-: प्राचार्या सौ.आहेर

सा.शनैश्वर टाइम्स वृत्तसेवा

नांदगाव-:वार्ताहर

विद्यार्थ्यांनी परीक्षेला जाताना भयमुक्त व तणावमुक्त असणे गरजेचे आहे.आणि कॉपी विरहित परीक्षा देऊन या विद्यालयाचा नावलौकिक वाढवावा असे आवाहन प्राचार्या सौ.पल्लवी विलास आहेर यांनी केले.

तालुक्यातील न्यायडोंगरी येथील लोकनेते कै. विजय शिवराम आहेर हायस्कुल व ज्युनियर कॉलेजमध्ये  दहावीच्या विद्यार्थ्यांचा निरोप समारंभ व महिला दिन मोठ्या उत्साहात साजरा करण्यात आला.त्यावेळी त्या अध्यक्षपदावरून बोलत होत्या.

        याप्रसंगी प्रमुख पाहुणे म्हणून मसाप सदस्य व कवयित्री सौ प्रतिभाताई खैरनार व नुकतीच सी.ए. पदवी संपादन केलेली विद्यालयाची माजी विद्यार्थ्यांनी कुमारी श्वेता चंपालाल कटारिया उपस्थित होते. सुरुवातीला मान्यवरांच्या शुभहस्ते माता सरस्वती, राजमाता जिजाऊ व लोकनेते विजूमामा आहेर यांच्या प्रतिमांचे पूजन करण्यात आले. 

       त्यानंतर प्रमुख पाहुणे यांचा शाल, श्रीफळ व पुष्पगुच्छ देऊन सत्कार करण्यात आला. तसेच सांस्कृतिक, कला आणि विज्ञान क्षेत्रात यश प्राप्त करणाऱ्या विद्यार्थ्यांना प्रमाणपत्र व पुष्पगुच्छ देऊन सन्मानित करण्यात आले. या प्रसंगी अनेक विद्यार्थ्यांनी आपले मनोगत व्यक्त केले तसेच शिक्षकांमधून पी.बी. आहेर व आय.पी.सोळुंके  यांनी ही मनोगत व्यक्त केले.         कार्यक्रमाचे प्रास्ताविक विद्यालयाचे उपमुख्याध्याक आर. के. सोनस   यांनी केले तर सूत्रसंचालन व आभार प्रदर्शन अनुक्रमे पी.जे. सूर्यवंशी व  पी.एन. सोनेज यांनी केले.