अखेर पापाचा घडा भरलाच ; तालुका भूमी अभिलेखचे विलास दाणी लाच-लुचपतच्या जाळ्यात.!

सा.शनैश्वर टाइम्स वृत्तसेवा

नांदगाव-: संतोष कांदे

खाजगी भूखंडाचे बिनशेती प्रकारात रूपांतर करण्यासाठी अतितातडीची मोजणी करून नकाशा तयार करून देण्यासाठी सुमारे ४० हजार रुपयांची लाच स्वीकारताना तालुका भूमी अभिलेखचे उपअधीक्षक विलास दाणी यांना आज कार्यालयात रंगेहाथ पकडण्यात आल्याने मोठी खळबळ उडाली आहे.

     

लाच-लुचपत प्रतिबंधक विभाग धुळे यांच्याकडून मिळालेल्या माहितीनुसार,येथील ४४ वर्षीय इसमाला व त्यांच्या भागीदारांना एका खाजगी भूखंडाचे बिनशेती प्रकारात रूपांतर करायचे होते.त्यासाठी त्यांनी अति तातडीची मोजणी करून नकाशा तयार करण्यासाठी तालुका भूमी अभिलेख कडे अर्ज केला होता.

   या अर्जावर तातडीने निर्णय घेऊन पुढील प्रक्रिया राबवण्याकामी उपअधीक्षक दाणी याने ५० हजार रुपयांची मागणी तक्रारदाराकडे केली होती.त्यातील पहिला हप्ता म्हणून ४० हजार रुपये देण्यापूर्वी सदर तक्रारदाराने धुळे येथील लाच-लुचपत प्रतिबंधक विभागाशी संपर्क साधून तक्रार केली.त्यानुसार आज कारवाई करण्यात आली.

        सदर कारवाई उत्तर महाराष्ट्र पोलीस अधीक्षक सुनील कडासने यांच्या मार्गदर्शनाखाली उपअधीक्षक अनिल बडगुजर (धुळे),पोलीस निरीक्षक मनजीत सिंह चव्हाण,पो.नि.प्रकाश झोडगे,यांच्यासह कैलास जोहरे ,कृष्णकांत वाडीले,प्रशांत चौधरी,महेश मोरे, संदिप कदम,राजन कदम,शरद काटके, 

भूषण खलाणेकर, संतोष पावरा ,भूषण शेटे,चालक सुधीर मोरे जगदीश बडगुजर आदी अधिकाऱ्यांनी कामगिरी फत्ते केली.

      दरम्यान या विभागाच्या कामकाजाच्या विरोधात तालुक्याचे आमदार सुहास कांदे यांनी काही महिन्यांपूर्वी आंदोलन छेडले होते.व माझ्या जनतेला त्रास द्याल तर थेट आत्महत्या करण्याचा इशारा ही याच अधिकाऱ्याला दिला होता.मात्र या कारवाई वरून सदर अधिकाऱ्याने काहीच धडा घेतला नसल्याचे निष्पन्न झाले आहे.